Mahni-a eizawnna bul \antute dawmkanna tur leh tih phurna tura Mizoram sorkar ruahman, Mizoram Kailawn – Business Plan Contest & Entrepreneurship Summit 2019 vawiin khan Aizawlah neih a ni.

0
469
views

Mizoram puma entrepreneur te leh entrepreneurship lama tui te pualin intawhkhawmna hi buatsaih a ni a, a kaihhnawiha sawrkar department leh mithiamte nen hun an hmang a ni. Chawhnu lama Plenary Session hmanpuitu Chief Minister Pu Zoramthanga chuan Mizoram Kailawn Business Plan Competition a ti \hate hnenah lawmman a hlan a, Mizo \halaite zingah entrepreneurship lama tui, hlawhtling tura tih tak meuha bei an awm chu lawmawm a tih thu a sawi a. Zoram in hma a sawn zelna turah hna thawh tur zawngtu ni lova a ruaitu zawk nih chu bung thar kai theihna tur a ni a, entrepreneurship chawikan chu sawrkar in a ngaipawimawh a ni a ti.

Chief Secretary Pu Lalnunmawia Chuaungo pawhin thu sawiin hmasawnna atan state sawrkar mai nilo sawrkar laipui pawhin entrepreneurship chu a ngai pawimawh tih a sawi bawk a. NITI Aayog chuan hmeichhiate zinga entrepreneurship tihhmasawn chu a ngai pawimawh zual a, Mizoram Kailawn intihsiaknaa a ti \ha zual finalist 40 zinga 16 hmeichhia an ni chu thil lawmawm tak a ni a ti.

Business Plan Competition buatsaihah hian mi 456 inziak lutin finalists mi 40 thlanchhuah te chu Boot camp neihpui an ni a. Top 20 finalist thlanchhuah leh an ni a, chung atang chuan lawmman dawngtu mi 5 an awm a, pakhatna, Zo Mushroom in cheng nuai 4 a dawng a, pahnihna Peter Vanlalhriata, Know Waste in cheng nuai thum dawngin; pathumna Dr. Vanramhlimpuii, Zonu Meat Processing in cheng nuai 2 a dawng a ni. Promising Ideas Award – Lalruatfela (Doorbell) leh Lalrinpuii Hmar (Blue Montis) ten an dawng bawk.

Mizoram Kailawn hi Mizoram sawrkarin Planning and Programme Implementation Department kaltlanga Mizo thalaite zinga Entrepreneurship chawikanna tura a buatsaih a ni a, Mizoram Entrepreneurship Development & Monitoring Committee MEDMOC leh IIM Calcutta: Innovation Park leh tualchhunga an thawhpui Mizoram Consultancy Group (MzGC) ten kum 2017 atang khan kumtin an buatsaih thin a ni.