Congress Legislature Party-a elected member 17 leh nominated member 3 te hian niminpiah khan Congress Legislature Party chu \hiatin BJP Legislature Party an zawm a, an hruaitu atan CEM nilai Pu N. Zakhai bawk an thlang nawn leh a ni. Congress MDC, BJP zawm thar 20 te bakah hian BJP MDC 2 awm sa te nen member 22 an awm ta a, BJP sorkar din an tum a ni.
CEM nilai Pu N. Zakhai chuan BJP an zawm chhan chu Central-a Congress an sorkar lai a\anga an lo buaipui tawh, Mizorama District Council te tana direct finance leh 6th schedule amendment te tih hlawhtlin theih an beisei vang a ni tih a sawi a, BJP an in chhuhluh hian beiseina sang tak an nei tih a sawi.
Hetihlai hian MADC-a member 5 nei mek, MNF Legislature Party hruaitu Pu HC Lalmalsawma Zasai chuan MADC Chairman hnenah lehkha thehlutin Congress MDC ten BJP Legislature Party an zawm chu an dan hman lai kalh a nih avangin MDC an nihna hlih sak turin a ngen ve nghal a, Chairman, Pu H. Sahlo hi damlohna avanga hmun danga a awm bo lai anih avangin Deputy Chairman, Pu K. Pawhnie hnenah lehkha hi a thehlut a, Pu H Lalmalsawma Zasai hian a \ul anih chuan Court-ah pawh an kal tur thu a sawi.
MADC-ah hian Congress party chuan seat awm zawng zawng 25-ah seat 17 lain 2017 May thla khan sorkarna an siam a, MNF-in seat 5 an la a, BJP-in seat 2 an la bawk a, IND member pakhat thlan tlin Pu K. Bana chu tunhnai khan a boral a ni.
Hetiang hi thil awmdan an nih tak avangin MADC ah hian Congress sorkar dinglai chu tlu-in BJP sorkar a ding dawn ta niin a lang a, BJP Legislature party thar hian Larsap hnenah sorkar an siam theih thu ziakin an thlen tawh a ni.
Congress party hruaitu, Pu Zodintluanga MLA chuan Zonet zawhna chhangin MADC-a Congress member bang ta ten an hlauh ber chu MNF sorkarin tih luihnaa an sorkar dinglai an \hiahsak a ni a ti a, BJP in hum thei tura an ngaih avangin hetiang hian an che ta nia a lan thu a sawi.
Hetihlai hian MNF party Treasure Pu Vanlalzawma chuan Zonet zawhna chhangin MADC-a an party legislature party hruaitu Pu H Lalmalsawma Zaisai hmalakna chu tun dinhmuna party in an hmalakna chin a la ni rih tih a sawi a, Thawh\anni khian a hmuna party hotute rorelpui tur leh a \ul apiang bawhzui turin an party GS Pu TC Pachhunga nen Siaha hi an pan dawn tih a sawi.
