MBBS leh BDS zir turte’n tluang takin counselling nei

0
363
views

National Eligibility & Entrance Test (NEET), 2017 hmanga Mizoram Quota-a MBBS leh BDS zir turte tan vawiin khan Chaltlanga Higher and Techincal Department, Technical Wing Pisa-ah Counselling tluang taka neih a ni a. Technical Wing hotute hnen atanga Zonet thu dawn danin, Counselling-ah hian zirlai 100 koh zinga mi 30 an inlan a, MBBS-a Mizoramin seat a neih zawng zawng, 17 chu pek chhuah vek a ni a, BDS-a Mizoramin seat 9 a neih zinga 6 chauh pek a ni thung a, hei hi vawiina zirlai inlan zingah BDS thlang duh lo an awm vang a ni a, BDS-a seat ruak 3 la awm hnawh khah nan hian kar leh Thawhtanni-ah Counselling hi neih that leh a ni dawn niin Technical Wing hotute chuan a sawi. Counselling tan hma hian zirlaite chu an vaia koh khawm an ni a, Higher and Technical Education Secretary, Pu Benjamin-a’n thil pawimawhte a hrilhfiah a, Central Pool atanga Mizoramin damdawi lam zirna tur seat a hmuh chu kum dang aia a tlem tak avanga MBBS zir duh zinga seat chang ta lo an awm chu pawi a tih thu leh, zirlaite chu he thil hi hrethiam tura a duh thu a sawi. Zirlaite seat pek an nih chungchangah Court lam atanga harsatna a awm chuan sorkar thuneihna piah lam a ni tih hre tur leh, hetiang hi a thlen pawhin sorkarin theihtawp a chhuahpui tur thu a sawi bawk.

Puan tawh angin, Mizoram Quota-a MBBS leh BDS zir turte tana Counselling hi July ni 19 khan neih a lo ni tawh a, hemi tum hian Category-I ah Chakma leh hnam dang zirlai telh an ni chu zirlaite an dodal a, a tuk, July ni 20-ah Counselling hi neih leh ni mah se, Central Pool atanga Mizoramin damdawi lam zirna tur seat a neih hnawh khat tura zirlaite tana Counselling neih tawh chu sut leh a ni a, sorkar laipui atanga Mizoram seat chan tur tihfel a nih hnuah Counselling hi vawiin khan a thara neih leh a ni. Central Pool atanga Mizoramin damdawi lam zirna tur seat 24-a neih bakah North Eastern Council hnuaiah seat 11 a nei bawk.