Meghalya leh Nagaland Assembly inthlan lo awm turin boruak a sang sawt hle a, Nagaland Congress-te chuan PM Narendra Modi-a party, BJP-in eiru awm lohna state siam an tum chu thil awihawm lo tak niin an sawi a. Nagaland Congress President, K. Therie chuan an state sorkar hmasa-ah pawh BJP hian eiruknaa fihlim lo hlir an thawhpui niin a sawi a, khawtlang nunphung Hindutva kaihhruainaa khalh luh an tum nia sawiin, chu chu dodal tlat tur leh sakhaw dang betute thliar hrang ngai lo sorkar din an tum niin a sawi bawk. Tun dinhmunah NDPP leh BJP-te an inthlak danglam thut theih loh avangin an ram chhe tawh sa pawh a aia nasa zawka an tihchhiat zel a rin thu a sawi bawk.
Meghalaya-ah pawh BJP-in mipui hip nan biak in lei a tum niin Rahul Gandhi chuan a sawi a, hei hi Union Tourism Minister, KJ Alphons chuan thu dik lo niin a sawi ve nghal a, sorkar laipuiin sakhaw hrang hrangte dinhmun chawisanna tur, cheng vbc 70 a lo sanction tawh niin a sawi bawk. Meghalaya dinhmun chawisan zel BJP-in a duh thu sawiin hei hi an sorkar hma atanga ruahman a lo nih tawh niin a sawi a, he ruahmanna hi tihpuitlin lohin a la awm reng niin a sawi bawk.
