Pu Lalrinchhana hi kum 84 mi a ni a, a ruang hi zaninah tlaivarpuiin naktuk chhun dar 12 ah vui a ni ang. Pu Lalrinchhana hi kum 1935-ah Serzawl khuaah a piang a, 1987, 1989, 1993, 1998 leh 2003 ah te MLA ah thlan tlin a ni a, \um thum minister lo ni tawh a ni a, a nupui leh a fa te paruk
a kalsan a ni.
MNF Party chuan Pu Lalrinchhana hi Mizoramin zalenna a sual laia nunna thapa hnam chhana penchhuak, ramhnuai sorkar leh remna awm hnu sorkara nihna pawimawh tak tak lo chelh tawh a ni an ti a, ‘Pathian leh kan ram tan’ tia a vanglai hun \ha hmangral a, Mizoram tana a theihna zawng zawng hlantu Pu Lalrinchhana hi MNF party chuan an uiin an sun takzet tih an sawi a, MNF party leh Mizo hnamin a theihnghilh tawh ngai dawn lo a ni an ti
Ex-Mizo National Army Association pawhin Pu Lalrinchhana hian Mizo Hnamin zalenna a sual khan a sorkar hnathawh lai leh a nupui fanaute kalsanin a rammu ve nghal tih an sawi a, ramhnuai sorkarah Defence Secretary anih bakah Mizo Evangelical Committee-ah a lu ber Chairman hna a chelh tih an sawi a, MNF sorkarah Minister hna a chelh chhungin dik leh fel taka rorelna kalpui duhtu a ni an ti. Ex-MNA Association General Assembly hnuhnung berah “Hnam Sipaite zingah Zalenna Meichher mit suh se” tih thupui a sawi chu an hre reng tawh dawn tih an sawi a, a thihna chu mizo hnam tan channa nasa tak a ni an ti.
Mizoram Pradesh Congress Committee pawhin Pu Lalrinchhana thihna chuan a barakhaihin an ui em em tih an sawi a, Pu Lalrinchhana chu MNF hruaitu, a hun \ha tam tak Mizoram leh hnam tan pe a, ram hnuaia kum 20 chhung rammu anih thu te, India sawrkar leh MNF inrem hnuah MLA atana vawi eng emaw zat mipuiten an thlan, MNF Ministry term hnih chhung Minister lo ni tawh a nih thu sawiin, ram leh hnam tana a inpekna leh a thawhte an chhuang tak zet tih an sawi.
Pu Lalrinchhana boral thuin Mizoram Assembly session neih meka sawrkar lam a\anga sawi chhuah a hlawh lo erawh chu mak an tih thu leh awm lo an tih thu MPCC hian an sawi.
