Mipui kharkhipna thupek kalpui mek chhunga kawlphetha hman man, bill sang tak dawng an tam avangin tunlai hian bill pekna hmun hrang hrangah complaint a tam hle a, Dept lam chuan reading thun luh sual vanga khawlin a chhutsual nia an hriat thu an sawi.

0
75
views

Hemi chungchanga ZONET zawhna chhangin P&E hotute chuan, hri leng avanga inkharkhip a nih avangin meter reading tih theih a nih loh bakah, February thla bill pawh pe hman lo an awm tih an sawi a, february thla bill pe hman lo te leh March leh April thla bill chu tunthla tir khan reading lak a ni a, bill reading te chu khawlah hmanhmawh taka dah luh leh a nih avangin tih sual palh a awm nia an ngaih thu an sawi a, bill sang tak dawngte chuan an bialtu te hnenah an complain thei tih leh siamthat theih a nih thu an sawi.

Bill an sem chhuah chu thla khat anga ziah a nih laiin, inkharkhip vanga thla hlui bill kal lo chu bill ba anga kalpui a ni tih Power and Electricity Dept hotute chuan an sawi a, heth hian late fee emaw, a pung emaw lak tel a ni lo tih an sawi.

P&E hotute chuan, tuna bill an sem chhuah chu rate hlui hmanga bill siam a ni tih an sawi a, domestic bikah unit 1-100 inkar chu cheng 3 leh pawisa 10, unit 101-200 inkar chu cheng 4.60 leh Unit 200 chunglam chu cheng 5.10 a chhut a nih thu an sawi a, bill thar chhuak leh tur atangin rate thar hman a ni tawh dawn a, unit 1-100 inkar chu cheng 3 leh pawisa 30, Unit 101-200 inkar cheng 4.80 leh Unit 200 chunglam chu cheng 5 leh pawisa 30-a chhut a ni tawh dawn tih an sawi.

Tun hnaia P&E in kawlphetha hman man Bill an tih chhuahah bill sang uchuak tak dawng an tam hle a, cheng sing 5 te, nuai chuang dawng te pawh an awm a, social media lamah sawisel a hlawh nasat bakah deptt pawhin complaint a dawng tam hle a ni.