Rampum huapa inkharkhip puan laia HSSLC Exam chhunzawm tura ruahmanna siam chungchangah hian ngaihdan inang lo a awm a, MBSE hian Thawhlehni-a hriattirna a tih chhuah hnuah nimin pawh khan Exam hi ruahmanna lo kalpui tawh anga kal tlangpui a nih tur thu a chhuah nawn leh a. Hetihlai hian nizan dar 7:30 khan MBSE Pisa-a \hutkhawm hmanhmawh-ah thlir nawn leh a ni a, hetah hian ruahmanna siam tawh chu an hnuklet leh a ni.
MBSE hian thuchhuah siamin ram pumah COVID 19 hri kai an pun tulh tulh avang leh he hri laka mipuite an fimhlim zel theih nana Sorkar laipuiin Mizoram Sorkar hnenah Exam chhunzawm rih lo turin a ngen tih an sawi a, he ngenna hi zahawm an tih avangin Exam chhunzawm tura hmalakna chu thu leh awm hma atan tihtawp lailawk a ni an ti. MBSE thuchhuah hian, COVID 19 lakah Mizoram a him thawkhat nia a lan avangin zirlai Exam hmabak laklawh neite hmakhaw ngaiin, Exam hi chhunzawm rel zet a ni an ti a, thil \ha zawk beiseina avangin \hulh leh a ni ta tih an sawi.
Pawl 12 exam hmabak, mahni khaw lama haw hman tawh, MBSE thupuan anga Exam tuma Aizawl rawn thleng hman zirlai engemawzat an awm a, Nizan khan Chalfilh Assembly bial chhung mi zirlai 10 chuang ten Aizawl an thleng a, exam \hulh a nih thu hriat zui a ni a, heng zirlai te hian haw lehna tur an neih tawh loh avangin MZP ten lo buaipuiin an rawn chuanna maxi cab hmangin tukin, tuk\huan eikham khan an thawn haw leh a, Tlabung lam a\ang pawhin zirlai pakhat Aizawl thleng hman a awm a, a awmna \hin hostel-ah inkharkhip avanga luh a rem tawh si loh avangin Vaivakawn Police lamin an buaipui a, Police zinga pakhatin an chenna ina awm rih turin a hruai a ni.
