Kum danga la tih ngai loh angin Miss Mizoram 2020 thlannaah hian District 10 aiawh thlan phawt tur a ni a, District MJA ten an district aiawh tur \heuh an thlang dawn a, heta thlan chhuah pakhat zel chu an awmna District hmingin Miss Mizoram title pek an ni ang a, Miss Mizoram Contest ah Open Audition ngai tawh lovin Finalist an ni nghal dawn a ni.
District aiawh thlang tur hian District MJA te chu an duh anga hma la tura zalenna pek an ni a. District thar 3-a District aiawh thlan dan tur pawh ruahman fel a ni tawh a, Hnahthial District aiawhtu tur thlanna chu MJA Hnahthial Sub-Division ten buaipuiin Lunglei District MJA in a enpui ang a, Khawzawl District aiawh thlanna chu Khawzawl-a MJA member ten buaipuiin Champhai District
MJA in a enpui ang a, Saitual District aiawh tur thlanna pawh Saitual a MJA member ten buaipuiin, MJA General Headquaters in a enpui dawn a ni.
Miss Mizoram thlanna buaipui tur hian District Hqrs. MJA tinte, Sub-Division MJA leh District danga MJA member-te thahnemngai taka hma la turin MJA General Hqrs. chuan a ngen a ni.
District MJA te hian January thla chhungin an hnuaia District aiawh tur thlanna zawh fel tur a ni a, District aiawh tur puan indawt dan tur leh puan hun tur chu Organising Committee nen la inbiakrawn tur a ni.
Miss Mizoram 2020 thlannaah hian MJA in Aizawl district a hrana a neih loh avangin Aizawlah Mizoram pum huapin Miss Mizoram 2020 Open Audition neih a ni dawn a, hetah hian Aizawl District bakah Mizoram chhunga cheng nghet apiang tel theih a ni ang. Beauty pageant kalphung pangngai angin district a finalist ni pha lote pawh Aizawl Audition ah hian an inlan leh thei dawn a ni.
Miss Mizoram 2020 hian nula kum 18 leh 27 inkar, feet 5’5 aia hniam lo, Mizorama cheng te an inlan thei dawn a ni.
