A hmanpuitu Chief Minister, Pu Zoramthanga chuan, Lungleia MZU Southern Campus din turah theihtawpa chakin sorkarin hma ala dawn tih a sawi a, tun hi a tawpna tur a ni dawn lova, Eastern Campus te pawh neih theih dan tur ngaihtuah zel a nih tur thu a sawi. Pu Zorama chuan, Mizo nationalism chu a \ha lo zawnga hman palh awm thei a ni tih sawiin, hnam dang huat chu nationalism tum a nih loh thu leh Pathianin Mizoram leh hnam a pek humhim a, hman tlaka chawikan chu a tum a ni tih hre turin zirlaite a chah a. Tripura-a Tuikuk-te awm hlen theihna tura an hmalakna chu a tlawlh hlauh a nih chuan Court-ah PIL thehluh a, Tuikuk-te chu India khua leh tui an nih angin Mizoramah kher \anpuina pek lova, tuna an awm mekna Tripura-a \anpuina pek a nih theih nan thlen an tum thu a sawi.
Higher & Technical Education Minister, Dr. R. Lalthangliana pawhin, MZU Southern Campus neihna tura kum 20 chuang beih a nih hnuaha hlawhtlinna hmuh a ni ta chu lawmawm a tih thu a sawi a, Pathianin Zoram mipuite \awng\aina a chhanna nia a ngaihthu a sawi. Pu Thangtea chuan, ramdangin Mizoram chu ram ralmuang leh muanawm, ziak leh chhiar thiam tamna leh sakhaw pakhat vuan tia an hriat a ni a, hetihlai hian ziak leh chhiar tam lam aiin chhawrtlak thiamna neih a pawimawh a, thiamna tak tak neite tan hna hmuh a har lo tih sawiin, hna zawngtu ni lova hnain a zawn thiamna nei ni turin zirlaite a chah a ni.
Inkhawm hi an pawl Vice President, J. Lalmuanzuala’n a kaihruai a, an pawl President Vanlalliana pawhin thu a sawi bawk.
