Mizoram aiawh tur Rajya Sabha member chu naktuk hian thlan a ni dawn ta.

0
55
views

He inthlanna neih turah hian Candidate pathum – rorel lai MNF Official Candidate, Pu K. Vanlalvena, Congress Candidate, Dr. Lallianchhunga leh ZPM Candidate, Pu B. Lalchhanzova an awm a, heng mite atang hian MLA-ten Mizoram aiawha Rajya Sabha member tur hi an thlang dawn a, chawhma dar 9 atanga tlai dar 4 thleng vote thlak theih hun hawn a ni ang a, tlai dar 5-ah vote tlate hi chhiar nghal a ni ang.

Mizoram aiawh tur Rajya Sabha member thlannaah hian MLA te chauhin vote an nei a. Dan pangngaiah chuan rorel lai pawlin a thlawp chu tling ngei tura ngaih a ni. MLA 40 awmna Mizoramah rorel lai MNF chuan MLA 27 a nei mek a, ZPM-in MLA 7, Congress-in MLA 5 leh BJP-in MLA 1 a nei a, MLA nei Political Party zingah BJP chu he inthlanna chuh lo awm chhun a ni a. Mizoram State BJP President Pu Vanlalhmuaka chuan vawiin tlaia Zonet zawhna chhangin an MLA hian tunge a vote dawn tih leh vote a thlak dawn em tih pawh an la sawi thei lo tih a sawi.

Mizoram atanga Rajya Sabha Member ni lai, Pu Ronald Sapa Tlau chu thla thar July ni 18-ah a hun a tawp tawh dawn avangin, Mizoram aiawha Rajya Sabha member tur hi thlan a ni dawn a. Returning Officer-ah Assembly Secretary ni lai, Pu H. Lalrinawma ruat a ni.

Tun thla ni 9 thleng khan he inthlanna chuh tumte tan hming pek luh theih hun hawn a ni a. Hetah hian tuna candidate ni ta mi pathumte hian hming an pe lut a, hming pekluh te hi a tukah endikin, pawm vek an ni a, inhnuhdawh theih hun tawp tun thla ni 12 thleng khan inhnukdawk an awm lo a ni.