Mizoram Chief Electoral Officer, Pu Ashish Kundra-a’n vawiin khan Aizawlah thuthar lakhawmtute kawmin inbuatsaihna peihfel a nih thu hi a sawi a, District hrang hranga vote chhiar tura inbuatsaihna a \ha thawkhat tih sawiin, tluang taka vote hi chhiar theih beisei a ni a ti. Vote hi zing dar 8-ah chhiar \an tur niin, Postal Ballot-a vote tlate chhiar hmasak a ni dawn a, a hmasa berah Mizoram Sorkar hnuaia hnathawkte vote chhiar hmasak ber a ni ang a, a dawtah Sorkar laipui leh State danga awmte vote chhiar leh a ni ang a, hemi hnu hian EVM a vote tlate chhiar chhunzawm nghal a ni ang.
Pu Ashish Kundra chuan, Election Commission of India-in ruahmanna a siam angin District 8-a Mizoram assembly inthlanpuia vote tlate chu Counting centre 13-a dawhkan 347-ah a ruala chhiar a ni dawn tih a sawi a, Lawngtlai District-a assembly bial pahniha vote tlate chu Round 5-a chhiar zawh hman tum a ni a. Siaha District-a vote tlate chu Round 5 leh Round 4-ah chhiar zawh tur niin, Lunglei District-a vote tlate chu Round 4 leh Round 3-ah chhiar zawh a ni dawn a, Serchhip District chu Round 3-ah chhiar zawh vek tur niin, Champhai chu Round 5 leh Round 4-ah chhiar zawh a ni ang. Aizawl District pumpui chu Round 3-ah chhiar zawh vek tum a ni a, Kolasib chu Round 5 leh Round 3-ah chhiar zawk tur niin, vote chhiar rei berna tur Mamitah chuan Round 6 leh Round 5-ah chhiar zawh hman tum a ni.
Pu Ashish Kundra chuan, Counting Hall tinah vote chhiarna dawhkan hran \heuh siam a ni dawn tih sawiin, Postal Ballot-a vote tlate chhiar \an a nih a\anga minute 13 hnuah EVM a vote tlate chhiar chhunzawm a ni dawn tih a sawi a. Vote chhiar round tin chu chhiar zawhfel nghal zel tur a ni a, zawhfel anih hma chuan round dang chhiar a ni dawn lo tih a sawi.
Naktuka vote chhiar turah hian Counting Official 1,401 ruat niin, Counting Hall tinah Counting Superviser 1, Counting Assistant 2 leh Micro Observer 1 zel an awm dawn a. ECI ruahman angin Counting Hall leh a chhehvel chu uluk tak ven tur niin, sipai thuah 3-a duty tir an ni dawn a. Counting Hall hnaih berah Mizoram Police Duty tir tur niin, a dawtah Mizoram Armed Police an duty ang a, a pawn berah CRPF sipai an duty dawn a, hemi atan hian CRPF Company 8 ruahman a ni. CEO chuan, Counting Hall-a lut tur reng reng phalna nei pawh thlalakna hmanrua leh Mobile phone kenluh phal a ni dawn lo tih a sawi a. Result hi mipuiten rang taka an hriat zung zung theih nan puanzar reng a ni dawn tih a sawi.
Zawhna chhangin CEO, Pu Ashish Kundra chuan, vote hi zing dar 8-a chhiar \an a nih dawn avangin Mizoram puma result kimchang chu rei lote hnuah hriat kim theih beisei a ni tih a sawi a. Vote chhiar rei zawng chu Counting Hall-a awmte chet ran leh ran lohah a innghat a, hetiang a nih rual hian zing dar 8:30-ah chuan candidate te dinhmun tlangpui hriat theih a beisei tih a sawi.
Vote hi EVM hmangin mi nuai 6 leh sing 2 velin an thlak a, Mizoram Sorkar hnuaia thawkten Postal Ballot hmanga vote an thlak zat chu 11,618 niin, Mizoram pawna sorkar hnathawk awmte vote thlak chu 526 a ni a, a vaia vote tla chu zaa 81. 64 a ni.
