Mizoram Assembly Speaker hlui, Minister pawh lo ni tawh Pu Rokamlova chu nizan dar 7:35 khan Ebenezer Medical Centre Aizawlah a thi a, kum 79 mi a ni.

0
103
views

Upa Rokamlova hi hrisel lohna in a tlakbuak avangin hun rei tak a lo bawksawp tawh a, damlo na zual enkawlna ICU-ah ni 46 a awm hnuah nizan dar 7:35 khan a rawngbawl sak thin a Lalpa hnenah a chawl ta a ni. Mizoram buai avanga mipuiten thangkhat lian zet harsat manganna an tawhte a vei avangin, MNF leh India sorkar inbiak rem dan tur ngaihtuahin Congress Party-ah a lut a, June ni 30, 1986 zana India leh MNF ten Inremna an ziahna hmunah pawh
a tel ve a ni.

Kum 1984 Assembly inthlanah Aizawl East Bial atangin Congress ticket-in thlan tlin a ni a, Pu Lalthanhawla Ministry-ah Education leh Social Welfare Minister mawhphurhna a chelh a. Kum 1987 inthlanah tling mahse, Opposition MLA a ni a. 1989 inthlanah bial ngai atanga tling leh in RD leh Transport Minister ah ruat a ni a, kum 1990 khan Assembly Speaker a ni.

Kum 1993 MLA inthlanah leh a hnua MP inthlanah Independent-a in candidate-in a tling zo lo ve ve a; kum 1994 atangin politics a chawlhsan a ni.

Kum 1963 khan St. Edmund’s College, Shillong atangin B.A. a pass a, 1965-ah Guwahati University atangin M.A. a pass leh a, March 2009 khan a rawngbawlna kawng hrang hrangte hriatpuiin Trinity College & Seminary, Churachandpur chuan chawimawina
Doctor of Divinity (D.D.) an pe a ni.

Upa Rokamlova hian M.A. a zawh hnu lawk, April 1966 ah Shillong-a Synod College-ah lecturer hna a thawk zawk a. Chumi hnu September 1968 atangin Pachhunga Memorial Govt. College, Pachhunga University College Aizawl ni taah lecturer hna a zawm leh a; Mizo Department Head a ni. 1973-ah Vice Principal-ah kai chhovin, September 1978 thleng a thawk a. Kum 1978 – 1981 chhung Aizawl College-ah Principal hna a thawk a. Chumi hnuah 1981- 1983 chhung khan NEHU, Mizoram Campus-ah Officer on Special Duty hna a chelh bawk.

Central KTP O.B.-ah kum 6 chhung a awm a, 1970-ah Kum 29 mi chauh a ni laiin Dawrpui Kohhran Upa atan nemngheh a ni a, Upa thlannaah hian vote awm zawng zawng a hmu vek a ni.

Upa Rokamlova hi vawiin chawhma dar 11 khan Aizawl Dawrpui venga a chenna in ah Aizawl Central Presbytery Moderator Upa Hmingthanga’n a vui a ni.