Mizoram BJP President-in MZU Vice-Chancellor thar ruat thuai a nih loh chhanah CM puh

0
540
views

Mizoram state BJP President, Prof. JV. Hluna’n Mizoram University-a Vice Chancellor thar ruat thuai a nih loh chhan chu CM, Pu Lal Thanhawla, a inrawlh lohna tura a inrawlh vang niin Aizawl Press Club-ah thuthar la khawmtute a hrilh a. Hemi chungchang hi tun thla ni 27-a New Delhi-a BJP National Executive Meeting an neih \umin Union Human Resource Development Minister, Pu Prakash Javadekar a sawipui nia sawiin, Vice Chancellor thar ruatna chu peih fel thawkhat a nih tawh thu a lo hrilh niin a sawi. Prof. JV Hluna chuan, CM hian President leh PM hnenah lehkha a thawn a, hei hi ngaih pawimawh ni chuang lo mah se, Search Committee-in mi 3 a chhawp chhuah zinga pakhat a inhnuhdawh leh avangin a hun takah ruat theih a ni ta lova. Tunah hian dan ang takin buaipui leh a ni a, a fel theih thuai beisei a ni, a ti a, CSS hnuaia Hindi zirtirtu 1,305 zingah Certificate fel lo leh zirtirtu tlak lo an awm nia Mizoram sorkar-in a hrilh avangin anmahni ruai nawn tura hma lakna chu tihfel theih a la ni loh thu pawh Union HRD Minister chuan a hrilh nia sawiin, Mizoram sorkar-in a inpeih thu a hrilh veleh CSS hnuaia Hindi zirtirtute chu chhawr chhunzawm leh an nih tur thu pawh a hrilh niin a sawi bawk.

Prof. JV Hluna chuan, State BJP Vice President thar atan Pi Judy Zohmingliani Reid, Aizawl Nursery Veng ruat a nih thu leh National Yuva Morcha Executive Member atan Pu Christopher Tolquhoun, Mission Veng ruat a nih thu a puang nghal a ni.