Mizoram Football Association in Annual General Body Meeting an nei

0
650
views

Mizoram Football Association in vawiin khan Berawtlang Convention Centre ah Annual General Body Meeting an nei.

District Football Association aiawh te nen Football a hmasawnna tur kawng hrang hrang an sawiho a.

MFA inkhawmpui palaite chuan resolution siamin India ram leh khawvel hriata football state ti hiala Mizoram hriat a nih theih nana hmalakpuitu MFA Founder President, Chief Minister Pu Lal Thanhawla leh Sports Minister Pu Zodintluanga te chungah lawmthu an sawi a. Mizoram sorkarin football hmasawnna atana kawng hrang hranga hma a lak avang leh District hrang hranga khelmual tha a siam avangin lawmthu an sawi bawk. MFA resolution chuan football a eizawng thei mai ni lova, sum leh pai tam tak lalut theia thalai tam tak siamtu Mizoram sorkar chu fakawm an tih thu an tarlang bawk a ni.

MFA President Pu Lal Thanzara chuan FIFA in Sairang MFA field ah phullem a phah tur thu a sawi a, Mizoram a football hmasawnna chu zone leh district te nena thawhhona \ha rah chhuah a ni tih a sawi.

MFA Hony Secretary Pu Lalnghinglova Hmar chuan Khelo India Boys ah Mizoram a champion thu te, Tata Trusts nena thawk duna Mizoram pum tuam tura grassroots football kalpui tum mek a nih thu te, Baby League mumal taka kalpui tum a nih thute, Champhai DFA te leh Eight One Foundation ten Young Legends League an kalpui thute a sawi. MFA Annual General Body Meeting ah hian Rajesh Kharabanda, Managing Director, Nivia rawn telin, MFA nen thawh hona thuthlung an ziak a. MPL a hman tur Nivia Ball thar, Futsal ball thar leh Mizoram team inthuamna tur Jersey te tlangzarh a ni. Mizoram Football Association chuan tehfung hrang hrang siama kum 2017-18 season chhunga District Football Association zinga ti tha ber thlanna a buatsuaih a, Champhai District FA hnenah lawmman cheng nuai khat a hlan a ni.