Mizoram Hindi Training College-a zirlaite chu vawiin khan an College tualah pungkhawmin, lungawi lohna hi an lantir a, an College-in Exam hrang hrang a neih mekah pawh \hu duh lovin an College Principal, Dr. Louis Hauhnar chu hmun danga sawn a nih loh chuan lungawi lohna hi lantir chhunzawm zel an tum thu an sawi a ni. Zirlai lungawi lo pungkhawmte chuan resolution siamin, an college-ah zirna a \hat tawk loh thu te, zirtirtu kum khata class vawi 2 chauh late pawh Principal-in a thunun ngai lo chu \ha lo an tih thu sawiin, zirna \ha pek an duh thu te, Mizorama Hindi B.Ed Training-na tihtawp a ni chu an hriatthiam loh thu te leh Agra lama an College Affiliation pawh Principal-in a tihtawp avanga Hindi zirlai B.Ed Training duhten harsatna an tawh mek thu te, College leh zirna in dangah Class kal loh avanga chawi a awm loh laia an College-in ni khat kal loha Rs. 100 an chawitir te, chawhnu kal loha Rs. 200 an chawitir te chu an hriatthiam loh thu te, Mizoram Hindi Training College chu Pre-service tana din a ni lova, In-service tana din a nih thu leh khawngaihna vang chauha training tir an ni tih Principal-in a sawi chu \ha lo an tih thu te, Admission Fee-ah Medical Fee an pe ziah chunga zirlai harsatna tawkte \anpui an ni ngai lo chu \ha lo an tih thu te, hmeichhia leh mipa hostel-a awmten kum khatah tui leh electric bill Rs. 2,400/- an chawi ziah chunga Phone Charge-na tur Plug lak sak an ni chu an duh loh thu te, an College-a training zingah hotuten duhsak bik an nei chu an duh loh thu te, kum tina pangpar khawina Pot ken tir an ni chu zirlai khawsak harsate tan phurrit a nih avanga tihtawh loh an duh thu te, an College-a Training-te ID siam nan kumtin Rs. 100 lak a ni chunga ID mumal siamsak an ni lo te, College Bus hmang ngai lo, mahni lirthei hmanga College kal \hin leh Hostel-a awmte thla tin Bus chuan man Rs. 300 chawitir an ni te chu an duh loh thu sawiin, College danga an tih anga Bus chuan man hi lak an duh thu resolution-ah chuan an pass a ni.
Mizoram Hindi Training College-a zirlaite lungawi loh thu hi hriat a nih veleh Higher and Technical Education Minister, Dr. R. Lalthangliana’n a endik turin Higher and Technical Education Jt. Director, Pu Ramhmangaiha leh a thawhpui a tir nghal a. Heng mite hian College hotute an biak hnuah MZP General Headquarters hruaitute leh Mizoram Hindi Training College Trainees’ Union hruaitute kawmin, zirlaite chu an lungawi lohna lantir mek tihtawp turin an ngen a, zirlaite thilphut zinga tihhlawhtlin theih awmte tihhlawhtlin a nih tur thu an hrilh a, an inbiaknaah hian Hindi zirlaite chuan tuna an Principal kaihhruaina hnuaiah hi chuan an thla a muan loh thu sawiin, Principal chu sawn a nih loh chuan lungawi lohna hi lantir chhunzawm zel an tum thu an sawi avangin inremna an siam thei rih lo a ni.
Hemi hnua Zonet zawhna chhangin Mizoram Hindi Training College Trainees’ Union President, Lalrawngbawla chuan, an zirlaipui class kal loh avanga Fine pe lote Exam phalsak an ni lo chu Exam an Boycott nachhan ber a nih thu a sawi a. An lungawi lohna hrang hrangah an College Principal chu a mawhphurtu berah puhin, Principal sawnchhuah chu an harsatna sutkian dan awlsam ber nia an ngaih thu a sawi.
