Kum tina tih \hin dan angin nimin khan khawvel puma kut silfai pawimawhzia inzirtir ni, Global Hand Washing Day hman a ni a, nimin kha Pathianni a nih avangin Mizoramah chuan he ni hi vawiin khan District hrang hrangah hman a ni. Aizawlah chuan Aizawl District Swachh Bharat Mission Gramin leh District Education Officer buatsaihin he ni hi Laipuitlanga PHE Deptt. Office Complex-ah school naupangte nen hman a ni a, Aizawl Bawrhsap, Dr. A. Muthamma chuan school naupang, zirtirtu leh sorkar hnathawkte chu natna hrik kai loh nana kut silfai pawimawhzia a hrilh a, PHE Executive Engineer, Pu Lalsanga’n school naupangte chu kut silfai dan a entir a ni. He inkhawmah hian kalkhawmte chuan kut silfai pawimawhzia an sawi rual a, hemi hnu hian an kut an silfai a ni.
————
Champhaiah chuan Vengthlanga Govt. Primary School II tualzawlah kut silfai pawimawhzia inzirtirna ni hi hman a ni a, PHE Executive Engineer, Pu J. Kapkima’n a kaihruai a, Health Worker, Pi Lalrammawii’n kut silfai dan dik, school naupangte a zirtir a ni.
—————-
Lawngtlaiah chuan kut silfai pawimawhzia inzirtirna hi District SSA Mission ruahman angin Lawngtlai III-a CYLA Hall-ah neih a ni a, Bawrhsap, Dr Arun T chuan hriselna atana kut silfai a pawimawhzia te, ei leh in tur thianghlim leh silhfen thianghlim neih a pawimawhziate a sawi a ni.
——————–
Mamitah chuan kut silfai pawimawhzia inzirtirna hi GSA Playground-ah Additional DC, Pu H.Lianzela hova neih a ni a,
he inkhawm hi SSA District Project Coorindator, Pu Lalsailovan’n a kaihruai a, Dr. Nancy Lalnunmawii’n kut silfai dan naupangte a entir a ni.
———
Lungleiah pawh SSA Mission bultumin District Chief Medical Officer, Dr. VLMS Dawngliana hovin kut silfai pawimawhzia inzirtirna ni hi Government Model Middle School-ah hman a ni a, CMO chuan kut silfai tawk loh avangin kum tin, naupang tam takin natna chi hrang hrang, kaw\halo leh áwm na (pneumonia) an vei tih sawiin, kut silfai \hin turin zirlaite a fuih a ni. He meeting hi SSA District Project Coordinator, Pu Micky R Lalenkawla’n a kaihruai a ni.
——–
