Mizorama Agriculture Basic Course zirna awmchhun Integrated Taining Centre (ITC) leh India ram pum leh North East huapa Award lo dawng tawhtu Krishi Vigyan Kendra (KVK) Hnahthial hmalakna te chanchinbumite hian an zirchiang a, Tuipui D-a Sangha humhalh an en bawk a ni.
MJA Gen.Hqrs. hruaitute hi an President Pu Zonunsanga Khiangte chuan hovin hruaitu dang mi 4 te leh MJA Hnahthial member ten an tawiawm a, MJA ten ITC an tlawhnaah hian Principal Pu James Vanlalluaia chuan lo dawngsawngin an dinhmun hrang hrang a hrilh a, ITC Hnahthial chu diploma course zirtheihna tura ruahman a nih thu a sawi a, tun dinhmunah thawktu Teaching Staff mi 6 leh Non Teaching Staff 11 an awm mek a, training nei lai mi 54 an awm a ni. Nikum November thlaa Council of Ministers thukhawmin ITC ah hian Diploma Course in Agriculture Science zirna hawn a remti tawh a ni.
KVK Hnahthial demonstration farm an tlawhnaah hian Dr.Lalmuanzovi, Sr.Scientist leh a hoten an lo dawngsawng a ni. KVK Hnahthial hian kum 2016 – 2017 khan North Zone-a KVK tha ber Best KVK Zonal Award-II a lo dawng tawh a, nikum khan NICRA Project kalpui tha ber Best NICRA (National Initiative on Climate Resilient Agriculture)-KVK, ATARI Zone VII a lo dawng tawh bawk a ni.
