Pu Kummanam Rajasekharan-a banna President-in a pawmna, Press Communique hi vawiin chawhnu khan Rastrapati Bhavan chuan a chhuaha, chutah chuan Mizoram Governor panngai ruat a nih hma zawnga a hna lo chelh lailawk turin Assam Governor Prof. Jagdish Mukhi ruat a ni tih tarlan a ni a, Prof. Jagdish Mukhi hi naktuk dar 11-ah Mizoram Larsap atan lakluh tura ruahmanna siam mek a ni a, a hun tur leh a la lut tu tur erawh chu tun dinhmunah a la hriat theih rih loh a ni.
Mizoram Larsap bang ta hian nikum May ni 29 khan a hna a zawm a, kum 1 tlin hma-in a bang leh ta a, amah hi Mizoram State Larsap 18-na a ni. A banna chhan hi sawichian awm lo mahse, Chanchinbu lama tarlan dan chuan hun reilote hnua Lok Sabha inthlanna neih tura Kerala, Tiruvananthapuram bial-ah BJP ticket-a din a tum vanga bang nia sawi a ni. Pu Kummanam Rajasekharan hi Mizoram Larsap a nih hmain Kerala State-a BJP President a lo ni tawh a ni.
