Zonet thudawn danin, Assam Forest Department hian Lailapur bula an Building luah tawh loh chu Inrinni khan an chei \ha a, hei hi hriat a nih ve leh Vaireng Civil SDO, Pu Isaac Lalrempuia hovin Vairenga Police hotute leh mipuiten an enfiah nghal a, helai hmunah hian Assam Forest Department hian hmathar an la ngei tih hmuh a nih avangin Mizo mipui leh Assam mipuite inkarah buaina tenau a chhuak hman a, hei hi a punlun hmain thuneituten an hmetmit thei a ni.
Assam Forest Department-in building an chei\hat hi Mizoram Sorkar aiawhten titawp turin hrilh mah se, Police venna hnuaiah Inrinni khan hna an thawk zo vek a, hemi ni la la hian he Building hi an luah nghal a, hetiang hi thil awmdan a nih avangin Mizoram Sorkar chuan ramria buaina chhuak thei veng tur leh Mizo mipuite venghim turin Vairengtea Police Check Gate thlanga Pioneer Camp hluiah IR Platoon 1 an tir lut ve nghal a, heng mite hi tun thlengin an la awm a ni.
Zonet thudan danin, inrinnia ramria buaina tenau chhuakah hian Mizo mipui leh Assam lam chu inep hman deuh mah se, kut inthlakna leh harsatna liantham thleng a awm lova, helai hmun hi Kolasib DC leh SP-in tlawh nghalin, tlawmngai pawl aiawhte hriatpuiin Kolasib SP leh Dholai-a Cachar DFO chu an inbe nghal a ni.
An inbiaknaah hian Cachar DFO hian an hmathar lakna chu Mizo mipuite harsatna siamtu leh buaina chawk chhuak thei a nih dawn chuan chawlhsan an hreh loh thu Kolasib SP chu a hrilh a ni. Hetiang hi thil awmdan ni mah se, Lailapur bula Assam Forest Department-in Building an chei\hat chu an luah nghal a, hei hi Assam Police-ten an veng bawk a ni.
