MNF sorkar-in sum leh paia harsatna a tawh mek avangin Central-a an thawhpui BJP sorkar malsawmna a mamawh niin MPCC hian an sawi a, hei vang hian Mizoram leh Mizo hnam tana chimralna kawng thlen theitu tur dan hlauhawm Citizenship Amendment Bill a dodal ngam lo a ni an ti a, CAB dodalna lantir tuma NGO Coordination hmalakna an hmehmih bakah dodalna lan tir an awm loh nan dan khauh tak hmangin Aizawl khawpui chhung hmun tam takah CrPC 144 hmanga punkhawm khapna an puang bawk tih an sawi.
MPCC chuan CAB hi a tir te atangin an party chuan a dodal nghal tih an sawi a; Pu Lal Thanhawla Chief Minister a nih laiin Union Minister of Law & Justice, Ravi Shankar Prasad leh Joint Committee on CAB Chairperson, Dr.Satyapal Singh te hnenah CAB dodalna lehkha na takin a lo thawn tawh a ni an ti a. Union Home Minister leh BJP National President ni bawk Amit Shah lo zin turah pawh hian MPCC chuan NGO Coordination Committee-in dodalna a lantir tur chu thlawpin, Congress member a tam thei ang berin tawiawm turin hriattirna leh ngenna a tichhuak a. Chawp leh chilh taka NGO lamin an thu an sut tak avanga CAB dodalna a taka lantir a ni thei ta lo chu pawi an tih thu MPCC hian an sawi.
CAB dodalna lantir tumte laka MNF sorkar chet dan chu mak an tih thu MPCC hian an sawi bawk a, CAB hi a taka kaltlangpui a nih a, Mizote himna tura ruahmanna a awm lo a nih chuan MNF Party chu Mizote himna tiderthawngtu leh mawhphurtu, hnam phatsantu diktakah an ngai dawn tih an sawi.
