Mizoram sorkar aiawhte leh HPC(D) hruaitute inbiakna neih chu thla leh, March ni 5-ah Aizawlah chhunzawm a ni dawn

0
572
views

Remna kawng zawnga Mizoram sorkar aiawhte leh HPC(D) hruaitute inbiakna neih chu thla leh, March ni 5-ah Aizawlah chhunzawm a ni dawn. ZONET zawhna chhangin Home Minister, Pu R. Lalzirliana chuan he inbiakna hi thuneihna sang zawk nei, Political Level-ah chhunzawm a ni tawh ang a, Minister-in a ho tawh dawn a ni. He inbiakna kal lai chhunzawm dan tur chungchang hi nimin khan Home Minister, Pu R. Lalzirliana hovin a Pisa-ah Home Deptt. Officer te nen sawiho a ni a, hetah hian inbiakna kalpui dan tur ruahman nghal a ni. Puan tawh angin hemi hmalama Official Level-a inbiakna lo neih tawh chu nikum September ni 22 khan zawhfel a ni a, hetah hian Political Level-a thuneitu sang zawk nena inbiakna neih huna inremna thutlung siam dan tur chungchang pawh sawihova ruahmanna pawh siam lailawk a ni tawh a, chutah chuan Sinlung Hills Development Council chu Sinlung Hills Council tia a hming thlaka thuneihna sang zawk pek dan tur chungchang te, he Council hi Elected Member 12, Nominated Member 2 neiha siam dan tur leh remna thuthlung siam hnua remna thuthlung anga HPC(D) hel pawl mi, nungphung pangngaia lo let te chhawmdawl zui dan tur te pawh a tel a ni.