Mizoram sorkar leh HPC-D inbiaknaa HPC-D thupuangtu, Pu Lalthalien-a’n inremna thuthlung anga Sinlung Hills Council dinna tur dan, Assembly-a Pass thuai an duh tih Zonet a hrilh

0
257
views

Mizoram sorkar leh HPC-D inbiaknaa HPC-D thupuangtu, Pu Lal\halien-a’n inremna thuthlung anga Sinlung Hills Council dinna tur dan, Assembly-a Pass thuai an duh tih Zonet a hrilh a. Inremna thuthlung, Memorandum of Settlement-in a kentel thil chi hrang hrang tifel tura an hmalaknaah tukin khan Mizoram sorkar leh HPC-D inbiaknaa sorkar lam aiawhte hotu, Chief Minister Political Adviser, Pu Lalrinmawia Ralte MLA chu a chenna in-a an hmuh thu sawiin, hetah hian Pu Lalrinmawia Ralte chuan, SHC din tura sorkar lailawk din tura ruahmanna an siam dan a lo zawh thu leh an ni lam chuan sorkar lailawk din lam ai chuan MoS in a kentel Sinlung Hills Council atana Bill an siam chu a taka hman a nih theih nana dan puitling, Act-a chan tir vat chu an duh ber a nih thu an hrilh niin a sawi a. Hei hi tihhlawhtlin a nih chuan Mizoram sorkar leh HPC-D in MoS an ziah chu a rintlak a ni tih mipuiin an hre thei dawn nia sawiin, hemi tihhlawhtling tur hian Assembly Special Session koh a, a rang thei ang bera Pass ni se tih chu an duh dan a nih thu a sawi. Zawhna chhangin, Pu Lal\halien chuan, Sinlung Hills Council Act siamna tur Bill chu duan lawk vek a nih tawh thu leh tunah hian Law Department-in a zirchian mek thu a sawi a. Inremna an siam dan chuan thla 6 chhungin SHC-ah hian inthlan hman tura tih a ni a, chumi hmaa Sorkar lailawk siamna tur File chu GAD lamah a kal palh avangin tunah hian File hi hnuk let a, Home Department khawih tura buaipui mek a nih avangin sorkar lailawk siam hun tur chu tihfel theih ala nih rih lo niin a sawi.

HPC-D thupuangtu chuan, Sinlung Hills Council-in a huam chin tur chu chiang taka tihfel ala nih loh thu sawiin, a bul\annaah chuan Sinlung Hills Development Council-in a luah chin chu rin phawt a nih tur thu a sawi a, sorkar thar siam a nih hnuah ramri chheh vela khaw hrang hrang chu SHC-a rinluh an duh leh duh loh an zawt ang a, a khaw neitute duh dan angin an Area-a rin luh tur a nih leh nih loh ngaihtuah a nih tur thu a sawi bawk. Puan tawh \hin angin, Mizoram sorkar leh HPC-D hian tun thla ni 2 khan inremna thuthlung, Memorandum of Settlement an ziak a, an inremna angin HPC-D helpawlte chuan tun thla ni 13 khan Sesawnga CTI-ah an silaite an tung a ni.

Hetih lai hian Sinlung Hills Development Council dinglai Term chu May thla tawp hian a tawp tawh dawn a. Council Chairman, Pu Hmingchungnunga chuan, an term chu Sorkar-in a pawtsei a nih loh chuan Office an luah chhunzawm tawh loh tur thu Zonet a hrilh a. Tun hnaia Mizoram Sorkar leh HPC-D in inremna an siamah Sinlung Hills Development Council chu \hiat a, Sinlung Hills Council din an remtih avangin an Term chu pawhsei theih a nih tawh loh thu leh an Term tawp hun hunah Sorkar thar a pian tawh tur thua sawi a ni. Zawhna chhangin, Pu Hmingchungnunga chuan, Mizoram sorkar leh HPC-D inremna a hlawhtlin leh hlawhtlin loh chu Sorkar thar pian hnua Mizoram sorkar-in a enkawl zui danin ala hril tur nia a ngaih thu a sawi a, SHDC Chairman hi kum 6 leh a chenve chhung zet chelh hman niin a sawi bawk.