Mizoram sorkar New Economic Development Policy hnuaia hmasawnna atana hmalakna pakhat, Mizoram Kailawn 2018 tih chungchang inhrilhfiahna vawiin khan Serchhip DC Conference Hall-ah neih a ni. He programme zirhonaah hian Master Trainer, Dr. Lalbiakzuali chuan NEDP hnuaia Entreprenuership Development Scheme sawifiahin suangtuahna a taka chantir theih neih a pawimawh dan te a sawi a, Mizoram Consultancy Group-a Pi Lalrinngheti Sangsiama chuan Mizoram Kailawn Business Plan 2018 tih sawifiahin a tel ve duh tan te ve theih dan a lem nena entirin a sawifiah a, Mizoram Kailawn 2017-a lawmman pakhatna la tu, Pu Lalsiamthar Serchhip chuan Entreprenuership Development Scheme hnuaia training chi hrang hrang a neih dan leh a hlawkpui dan te he inkhawmah hian a tarlang a ni. He inkhawmah hian Mizoram mi kum 18 chunglam eizawnna ngelnghet din tum emaw, sumdawnna emaw, thil siamchhuahna lamah emaw atak chang thei suangtuahna nei tan Mizoram Kailawn hnuaiah Business Plan Contest sorkarin a buatsaih mekah tel theih a ni tih tarlan a ni a, an ruahmanna siam chu tun thla ni 10 thleng www.mizoramkailawn.org-ah thehluh theih a ni a, result chu May ni 23-ah puan a ni dawn tih tarlan a ni bawk. He inkhawm hi Additional DC, Pu Chuauhnuna’n a kaihruai a ni.
