Kumin June 12 leh July thla inkara Mizorama chhiatna thleng thawi damna turin Mizoram sorkar chuan sorkar laipui atangin Rs 1,16,00,00, 000/- a dil. A dilna hi Inter-Ministerial Team Mizoram tlawha lo zin hnenah vawiin khan a hlan a ni. Sorkar laipui aiawha Inter-Ministerial Central Team Mizoram tlawha lo zinte hi Ministry of Home Affairs-a Joint Secretary, Pu Dilip Kumar an a hova, vawiina Aizawl chhuahsan a Lengpui tum hmun an pan hma-in Disaster Managment & Rehabilation Secy. Pu Zothankhuma leh Senior Officer ten State Guest House-ah an hmu a, hetah hian Mizoram sum dilna Memorandum Central Team hruaitu kutah an hlan a ni. Hemi rual hian ngaihhruina Mizo thil Central Team Member-te hnenah hian an pe bawk a ni. Hemi hnu hian Central Team hian Delhi-a haw turin Lengpui tum hmun an pan a, Mizoram sorkar Officer ten an thlah liam a ni. Central Team lo kal hian Inrinni leh Nimin khan hmun hrang hrang a ruahsur nasa leh tuilian thil tih chhiat a hmunah an en a, nimin khan Saron Veng leh Tuithiang inrinna a leimin vanga chhiatna thleng awm dante, Aizawl – Reiek kawng a Dihmunzawl thlen hma a leimin nasa takin kawng a tihchhiatte, MG Road-a Bible House dinna lei tla hniamte, Hunthar Veng-a leimin leh lei tla hniamte leh Zemabawk-a leimin kawng hnawhping thintu te an en bawk a, Aizawl Bawrhsap Pu Kannan Gopinathan, PWD Officer te leh DM&R Officer ten an enpui a ni. Puan tawh angin Central Team hian Inrinni-a Aizawl an luh hma in Sairang-a Tlawnglui lian thil tihchhiat an enfiah hmasa a, hemi hnu Inrinni khan Helicopter-a kalin Khawthlang tuipuiin Tlabung leh a chhehvel a khaw tam taka mihring chenna in leh lo bakah huan thlai leh thil dang a tih chhiat dan a hmunah an en bawk a ni.
