Mizoram State Sports Council hnuaia cheng vbc 8 leh nuai 25 senna tur work order tunhnaia tih chhuah chu kum 2019-20 chhunga sum dah sa, hmun danga hman rem tawh lo niin Sports & Youth Services Dept. in a sawi.

0
60
views

Sports Dept. hian work order tih chhuah chungchang sawifiahna a ti chhuak a. An tarlan dan chuan hmun hrang hranga infiamna ruhrel dinna turin kum kalta, 2019-2020 khan Finance Department in Sports & Youth Services Department hnenah cheng vbc 8 leh nuai 25 pe a; hnathawhna tur pawisa hi 2019-2020-a dah fel vek tawh, hmun danga hman rem tawh lo leh hemi atan chauha hman tur a ni an ti a, hei vang hian a nihna tur ang taka hman tura chhawp chhuah a ni an ti.

Sports Dept hian hna chi hrang 7 te hi Mizoram State Sports Council hnuaia thawh tur a ni a, hun bi tuk chhunga zawh tura tih a nih avangin fur ruahtui tlak hmaa hna tan tura ruahman a ni an ti a, hei avang hian financial rules zawm chungin Restricted Tender hmanga hna thawktu tur pawh zawn a ni a, hnathawktu tur thlan fel a nih hnuah work order tihchhuah a ni an ti.
Sports Department chuan, a hmanna tur awm sa a pawisa pek a nih angin Departmnet chuan, Covid-19 hri karah pawh a hun taka hna thawh zawh a nih theih nan hma a la a ni an ti.

Covid-19 do beihpui thlak lai pawha sports hmasawnna atana chak taka hmalakna kalpui anih avangin sports lama mi thahnemngaite leh infiammite hnen atangin lawmthu pawh Department-in a dawng tam hle niin Sports Dept thuchhuahah hian tarlan a ni.