He mobile application hmang hian State dang atanga bungraw phurlut turte chuan sorkar pisa-a anmahni kalkher ngai lovin, mobile application hmangin phalna an hmu thei dawn a ni. mPASS hnuaiah hian Registration, Permission leh Declaration tih te bungraw phurluttuin a mamawh dan a zira phalna a lak theihna tur a awm a. Checkgate-a Medical Duty ten mPASS ID hi Portal-ah an lo chhiin chhiah zel ang a, hei hian bungraw chevel leh a phurlutte chhui zuina kawngah a pui dawn a ni. mPASS hman dan leh state dang atanga bungraw chawk luh dil dan kalphung hi MSeGS Ict Youtube channel ah en theih tura dah a ni.
Mipui kharkhipna thupek dinglaiah State pawn atanga bungraw lakluh theih zingah nitin mamawhte chu phalna hranpa lak a ngai lo a. SDO(C), Vairengte emaw SDC, Bairabi hnenah an thil phurh kimchang ziakin an thehlut tur a ni thung a. Nitin mamawh ni lo, ei leh bar zawnna leh hmasawnna hnathawhna tur bungrua – steel, cement, brick, balu, insakna bungrua ilo – la lut turte erawh chuan Home Department phalna an la hmasa tur a ni, tih a ni. mPASS Application hmang hian heng phalna te hi mahni kher kal ngai lovin online-in a lak chhuah theih dawn a ni.
Mizoram chhunga thilsiam leh tharchhuah te, Mizoram chhunga hmun hrang hranga phur thei tura Bawrhsap office atanga phalna lak ngai pawh online-a lak chhuah theih tur hian ICT dept in a buaipui mek a ni.
