Mizorama Covid 19 hri kai hmuh chhuah tamna ber Aizawl District-ah hri kai 106 an tling tawh.

0
93
views

Aizawl District-a hri kai hmuh tawh zinga 39 chu enkawl dam tawh an ni tawh, enkawl mek 67 an la awm a. Nimina Aizawl District mi hri kai hmuh thar 14 zinga 13 chu harsatna an neih hran loh avangin Berawtlanga Covid Care Centre-ah dah an ni a, midang pakhat chu ZMC-a dah a ni thung. Heti hian ZMC-ah hri kai 30 enkawl mek an ni a, Berawtlanga Covid Care Centre-ah 37 enkawl an ni bawk.

Hnahthial District chu hri kai awm lohna District a ni chhunzawm zel a. Lunglei District-ah nimin khan hri kai thar 5 hmuh belh an nih avangin Lunglei District-a hri kai hmuh tawh chu 63 an tling tawh a, an zinga 47 dam tawhin, enkawl mek mi 17 an awm a. Lawngtlai-a hri kai 21 hmuh tawh zinga 8 dam tawhin, mi 13 enkawl mek an ni. Mamit District-a hri kai 20-te pawh enkawl dam vek an nih hnuah nimin khan hri kai thar 1 hmuh belh a nih avangin enkawl lai 1 a awm a. Siaha-a hri kai enkawl lai 8 chu an dam tawh avangin Thawhlehni khan damdawi in atanga chhuah tir an ni a, Siaha-ah hian enkawl lai mi 6 an la awm a. Siaha-ah hian hri kai hmuh tawh 23 zinga 17 an dam tawh a ni. Champhai-a hri kai 10 zinga 9 enkawl dam an ni tawh a, mi pakhat enkawl mek a ni a. Serchhip-a hri kai 5 hmuh tawh zinga 3 dam tawhin, enkawl lai 2 an awm a. Kolasib District-a hri kai 12 zinga 11 enkawl dam tawh niin, enkawl lai 1 a awm a. Saitual leh Khawzawl District-a hri kai 3 hmuh tawh chu an dam vek tawh avangin damdawi in atanga chhuah tir an ni tawh a ni.

Vawiin khan ZMC Covid-19 laboratory-ah Aizawl, Kolasib, Serchhip leh Vairengte atanga sample dawn 248 endik a ni a, zaninah result hriah theih beisei a ni. ZMC Risk Ward-a enkawl lai pakhat chu hri a kai tih finfiah a nih avangin vawiin khan Isolation Ward-ah sawn a ni. ICU-a awm mek damlo 3-te zingah khawsik leh thawhah nasa lutuk lo nei mi 1 a la awm a, midangte 2-te erawh chuan hma an sawn zel a ni.