Khualzin, Tourist te behchhana Mizorama eizawngte mumal taka enkawl an nih theihna tura sorkara an inziah luhna tur dan thar ‘The Mizoram (Registration of Tourist Trade) Bill 2020’ chu nimin khan Mizoram Assembly in a pass a, he dan puluttu Tourism Minister Pu Robert Romawia Royte sawidanin Dan thar hnuaiah hian khualzin behchhan-a eizawnna chi hrang hrang te chu mumal zawka enkawl leh khuahkhirh an ni tawh ang a, Hotel leh Restaurant ang chi te chu service an pek dan mila thliar hrangin, chumi mil chuan an rate te pawh bithliah sak an ni ang a, hetihlai hian sorkar laipui hriatpuia hotel, rating lo tih tawh sa te erawh a huam dawn lo thung.
Hotel leh Restaurant ang chi te bakah khualzin kaihhnawiha eizawng, tourist behchhana dawr siam emaw ang chi te pawh he Dan hmang hian sorkarah an inziahluh vek a \ul tawh dawn a, motor kawngpui sira eitur lamna hmun leh riahna hmun restaurant leh road side hotel ang chi zawng zawngte pawh Dan hmang hian ziahluh an ni ang a, khualzinte hnenah service \ha ngei an pek theihna turin an tih tur chin bithliah sak vek an ni ang.
Heng bakah hian khualzin lo buaipuitu Tour operator leh khualzin lo kaihruaitu tour guide ang chi te pawh Dan thar hnuaiah hian sorkarah an inziahluh vek a ngai dawn a, hei hian eizawnna huang thar a siam belh beisei a ni tih Tourism Minister chuan a sawi.
