Thupek thar hi nizan zanlai pelh hnu khan tih chhuah a ni a, Aizawl Municipal area chhung, District Hqrs leh Deputy Commissioner ten hri leng darhna hmun, containment area-a an puanah te chuan mipui khuahkhirhna khauh zawka kenkawh nghal a ni a, dawr leh sumdawnna hmun hawn khap a ni a, nitin mamawh zawrhna dawr, mihring leh ran damdawi dawr, clinic te, thlai chi leh lei tha zawrhna, kuthnathawktute hmanraw zawrhna, ranchaw zawrhna leh bungraw phur mamawh oil leh spare parts zawrhna dawr te chu DC leh LLTF/VLTF te ruahmanna siam anga hawn theih a ni dawn thung. Mimal eizawnna, puan thui, puan tah, thing mistiri hna leh chhang siamna ang chi te erawh phalna hranpa lak ngai lova thawh phal a ni.
Aizawl Municipal huam chhung, District khawpui leh containment area-a puanah te chuan phalna nei lovin mahni in leh compound chhuahsan khap a ni.
Khaw dang zawngah chuan dawr, sumdawnna leh eizawnna te dan pangngaia kalpui phal a ni.
Zirna in, training institute leh sakhaw biakna hmunte khar chhunzawm a nih rualin, inneih inkhawm leh mitthi vuina-a mi 20 aia tam lo punkhawm phal thin chu mi 35 ah tih pun a ni.
State dang nena inkalpawhna khar mekte khar chhunzawm a ni a, Lengpui Airport chu naktuk tlai dar 5 atangin khar a ni ang.
Mizorama lo haw tharte quarantine centre-a an awm chhung tura ruat ni 14 ni thin chu ni 21 ah pawhsei a ni a, Quarantine centre-a an awm chhung hian Health Dept in RT-PCR test an ti ang a, Home quarantine chu tul zualah chauh phal a ni tawh dawn a ni.
Sorkar hnathawk, pisa kai tur zat pawh tih tlem leh a ni a, Group A officer, Aizawl leh District headquarters danga thawkte chu dan pangngaiin pisa an kai ang a, Group B te chu a zatve leh Group C leh D te chu hmun thuma thena hmun khat zelin an inkal chhawk ang a. Aizawl leh District khawpui ni lo, hmun danga sorkar office-a thawkte chu a pangngaiin, an vaiin an kal dawn a ni.
