Assembly Budget Session neih mek a ZPM member, Pu VL Zaithanzama zawhna ziaka a chhanaah Home Minister chuan, ramhnuai a\anga MNF lo kir chu mi 581 an nih laiin mi 667 hnenah sorkar hna pek an ni tawh tih a sawi a, chungte chu Group B-ah mi 29, Group C-ah mi 312 leh Group D-ah mi 326 an ni a, Sorkar hna pek hnuhnung ber chu nikum December thla kha niin, hetah hian mi 13 hnenah hna pek an ni a, heti hian Peace Accord MNF Returnee Association (PAMRA)-in Mizorama Sorkar hnena hna pek tur list GAD-a a thehluhte chu Sorkar hna pek kim an ni tawh a ni, a ti.
MNF leh India sorkar-in inremna thuthlung, Peace Accord an ziaha Mizoram tana tihpuitlin tur an duan zingah Mizoramin a duh a nih chuan ama pualin High Court a nei thei ang tih chu tihpuitlin loh la awmchhun a ni, a ti a. High Court hran nei tura hmalak ala nih loh chhan chu tun dinhmunah Mizoramah Gauhati High Court, Aizawl Bench a awm thova, hei hian Mizoram mamawh a phuhru rih nia hriat a nih bakah High Court puitling hi mahni puala neih a nih chuan sum tam tak senbelh a ngaih dawn avangin a tihlawhtling tura hmalak a la ni rih lo a ni, a ti.
