MNF Party chuan Chakma Autonomous District Council-a sorkar siam an tum chungchangah naktukah thutlukna hriat theih a beiseiawm niin a sawi

0
212
views

MNF Party chuan Chakma Autonomous District Council-a sorkar siam an tum chungchangah naktukah thutlukna hriat theih a beiseiawm niin a sawi. Hemi chungchanga vawiina thuchhuah an siamah MNF Party chuan Chakma Autonomous District Council-a sorkar siam thei nia an insawina April ni 28-a Larsap hnena an thehluh copy chu District Council & Minority Affairs Secretary, Pu Rodney L. Ralte hnenah vawiin khan ngaihtuah zui turin an thehlut niin an sawi a, thil awmdan an zawhfiahnaah Pu Rodney chuan MNF MDC te leh BJP leh Congress MDC \anghoten sorkar siam an tum chungchangah rawtna pahnih siama chu chu sorkar ngaihtuah tura chhawpchhuah niin a sawi a, rawtna pakhatna chu MNF MDC ten an ngen anga thlawptu an ngah tawk leh tawk loh fiahna tur floor test neih a ni a, rawtna dang chu United Legislature Party dintu BJP leh Congress MDC te rawt anga sorkar siam tura anmahni sawm a ni a, heng thil pahnih ngaihtuah tur te hi Chief Minister-ah thawn phawt a ni ang a, chumi hnuah Larsap hnena kal turin Raj Bhavan-ah thawn leh a ni ang a, thutlukna chu naktukah hriat theih a beiseiawm niin an sawi a ni. MNF Party thuchhuah chuan MNF MDC te hian vawiin khan Raj Bhavan-ah Larsap hmu-in, BJP leh Congress \angdun din, United Legislature Party hruaitu Santi Jiban Chakma chuan Chief Executive Member a nih hma, rinawmna thutiam pawh a neih hma-in District Council Day-ah khuallian niin National Flag leh District Council Flag a pawt pharh niin an sawi a, hemi bakah hian CEM ang maiin sorkar officer engemawzat hruaiin, damdawi in a tlawh a, chaw te pawh a sem niin an sawi a, hei hi dan bawhchhiatna lian tak, chhui chian ngai a ni tih sawiin, Chakma Autonomous District Council-a CEM atan pawh dah tlak loh a ni tih Larsap an hrilh a ni.