MNF Party in Sports Council hnuaia cheng vbc 8 nuai 25 man contract 7 thawhna tur work order pek chhuah chungchang Congress party in an thlir dan chu ram hmasawnna dona leh intodelh tura Sorkar hmalak mekna dona a ni an ti.

0
329
views

Congress party in contract pek chungchang an sawi dan leh work order-te an hal chu ram a hmangaih loh thlak hleah an ngai tih MNF party hian an sawi a, ram hmasawnna dona, intodelh tura Sorkar hmalak mekna dona a ni an ti a, Hripui leng karah pawh sorkarin kutsuiha indawmkun mai lovin, intodelh tur leh, hmasawn turin a bei hram hram a ni an ti a, sorkar hmalakna chu a ropui an ti tih an sawi.

Hri leng karah ei leh bar hnianghnar taka mipuiten an nei thei te, kawng tha Mizoramin a nei chho zel thei te, thingtlang mite tana ni za inhlawhna tam zawk siam sak an ni zel thei te, lei let thei lote leh sak an ni mek te leh hmasawnna lamtluang mipuiten an zawh zel thei te chu lawmawm an ti hle tih MNF party hian an sawi a, Chief Minister Pu Zoramthanga, Minister-te leh sorkara mawhphurhna latute inpekna leh hnathawhte an chhuang hle tih an sawi.

Congress party chu hri leng mek politics-a hlawkna atana hman tumah MNF Party hian an puh a, hri vangin sorkar kal mumal lo se, mualpho se tih chu an duh ber a ni an ti a, an thil duh leh an tum chu Pathian leh mipui zarah MNF party chuan a thlentir phal dawn lo tih an sawi.

Sports Council hnuaiah May thla atanga June ni 23 thleng khan Contract 7, cheng vbhc. 8 leh nuai 25 man chu restricted tender hmanga pek chhuah a ni tih Congress Party chuan Ningani khan chanchinbumite hmaah an sawi a, sum harsatna chhuanlama Sorkar hnathawkte hlawh bat thensak an nih mek laia Fair lo taka contract pe-ah sorkar an puh a ni.

Congress party-in RTI hmanga an dil chhuah, sorkar lehkha atanga a lan danin heng hna te hi Serchhip Leisekawt Field-a tlang rawt hniamna tur leh retaining wall siamna tur te, SEDP hnuaia infiamna ruhrel dinna tur te, North Vailaiphai khelmuala Pavillion sakna tur te, Aizawl Tlangnuam khelmual chei thatna tur te, Aizawl Mission Veng-a Table Tennis Hall tih zauhna tur te, Sports Council hnuaia infiamna hmunhma chei thatna tur leh enkawlna tur te a ni.