Ex Mizo National Army General Assembly Chanmari YMA hall-a vawiina neihah thu sawiin Pu Zoramthanga hian, Mizorama Congress chu Pathian programme a kal anga insawiin zu an zuar a, 2013-2018 inkar zu zawrh chhungin police 500 chuang leh civil mi pawh 5000 atanga 7000 inkar an thi hman a ni a ti.
Pu Zoramthanga hian inthlan hmasaka rigging hmanga MNF te MLA an pek phal zat chiah Pathianin Congress party chu MLA a pe ve ta tih a sawi a, ramchhunga state hrang hranga ro an relnaah pawh an buai chho hle a ni a ti.
Pu Zoramthanga hian Congress thil tih dan chu chunglam duhdan a nih loh avangin a rorelna a rawn thleng tih a sawi a, MNF chu ‘Pathian leh kan ram tan’ tia zalenna sualtu an ni tih a sawi a, hei hi an ropuina leh an chhuan tur neih chhun a nih thu sawiin tuna mite hian chhawmnung zel turin a sawm a ni.
Ex Mizo National Army President Pu Pu Rochungnunga kaihhruai Assembly ah hian Home Minister Pu Lalchamliana pawhin thu sawiin ram tana zalenna sualtute fiamthu thawh nana hmang an awm \hin chuan a rilru a tina \hin tih a sawi a, tute emaw phur thut leh vai huat vang ringawta ram hnuaia chhuak an ni lo tih sawiin, zalenna tak tak suala beitute an nih thu a sawi a, zalenna chu Mizoten an pianpui a ni a ti. Pu Lalchamliana hian Mipui remtihnain zalenna an sual a, mipui remtihnain inremna an siam leh tih a sawi.
Hnam Martar, hnam sipai hlui leh an chhungte tan reiloteah a taka pen chhuah theih an inbeisei tih Home Minister hian a sawi a, an tan engemaw tak an la ti a nih pawhin Mizo mipuiin an thik a rin loh thu a sawi.
EX MNF Assembly hi Dy Chief Whip Pu Lalrintluanga Sailo leh Pu Zothantluanga MLA te pawhin an hmanpui a ni.
