MPC Party puipate, an President, Pu Lalhmangaiha hova vawiina an party pisaa thukhawm chuan, Congress chu ram zalenna ni champha dodal ngai khawpa khua leh tuite beidawnna thlenah puhin, vanduaithlak an tih thu an sawi a, MNF-in thuneihna a chan laia vote zawnna atana Saitual, Khawzawl leh Hnahthial District a lo puan tawh tihpuitlin a nih loh avangin heng bial chhunga mipuite an beidawng hle nia sawiin, an lainat thu an sawi a, Congress leh MNF chu Mizo mipui tan belh tlak tak tak an nih lohzia a tilang chiang hle niin an sawi. MPC chuan, Mizoram hmun hrang hranga kawng siam thatna tura Contractor ten pawisa an lak vek tawh chu a taka thawh zui a nih loh avangin mipuiin anmahni sum sengin an siam that a ngai ta nia sawiin, vanduaithlak an tih thu an sawi a, hei hi Congress sorkarin ram mipuite aia an sangawizawnpui contractor-te an ngaih pawimawh zawk thin vang niin an sawi bawk.
