He thu hi vawiina Congress Bhavan-a inkhawmah sawiin, hmarchhak bial pum huapa CAB dodal a nih lai leh Mizoramah ngei pawh Jt. NGO Coordination Committee leh Political Party hrang hrangin na taka an dodal laiin, MNF party chuan Mizoram mipui beisei an pha lo hle niin a sawi.
Pu Lal Thanhawla chuan, ram pumah BJP chu nasa takin an tlahniam mek nia sawiin, state tam takah an thawhpuiten an bansan mek zel a ni, a ti a. Chutih laiin sum leh paiah an buai loh avangin man beh theih tam tak an la nei a, Mizoramah ngei pawh nasa takin MNF an vur a, Mizoram state BJP hruaitute thik khawpin an vur niin a sawi.
BJP kaihhruai Sorkar laipui chu kalphung awmsa zah miah lova India rama mahni a thuneihna nei institution hrang hranga inrawlh-ah puhin RBI an suasam dante chu India rama la awm ngai lo a ni, a ti a. University tam takah zirlai leh kalphung thlak tumin hma an la a, University zirlai tam takin BJP sorkar thiltih dante hi duh lovin nasa takin an auchhuak mek a, eizawnna thar vaibelchhe tel siam tur anga an insawi pawh an la tihlawhtlin theih loh avangin \halai hna zawng mekte lakah nasa takin an tlahniam a, an hmalakna hrang hrang avangin India ram inzawmkhawmna tha tak thin pawhin nasa takin a nghin phah mek niin a sawi.
Pu Lal Thanhawla chuan, Chief Minister thar, Pu Zoramthanga chu thil \ha duh mi a nih tih sawiin, a hmalaknate pawh hlawhtling se a duhpui thu a sawi a, hetihrual hian a sum eiruk vaibelchhe 9 leh nuai 69 chuang chu police-in an la kawl reng niin a sawi a. ACB-ten a in an dap dawn tih a rukin a hre lawk vek chunga pawisa heti zat man sak theih a la ni chu a mak a, Pathian remruat ni hiala a hriat thu a sawi.
MPCC President chuan, MNF chu an ze hlui la sim lovah puhin, Congress sorkarin sum ren chem taka a hman bang chu MNF kaihhruai sorkar thar chuan an hmang pawp pawp nia sawiin, hetiang taka sum hman an huai hi finance lam mithiam tam takin mak an ti a, BJP lam nen intiamna ruk an nei em ni tih ngaihtuah tham tak a ni, a ti a.
Congress kaihhruai sorkar khan Zu hi a \ha em a, i zuar teh ang an ti lo a, khawvel hnam tinin zu an nei vek a, Mizo tluka zu in thiam lo leh buaipui hnam an awm loh avangin heti em em a buaipui loh dan hi a awm em tiin control chungin a zuar mai chauh a ni, a ti a. Kum 2/3 lek liam hnuah zu in \hinte pawhin an thiam sawt hle tawh laiin, thlohpui rorel ang maia a bul a\anga buaipui leh a ni tur chu pawi a tih thu Pu Lal Thanhawla chuan a sawi a ni.
He inkhawmah hian Lok Sabha member, Pu CL Ruala leh MPSC Chairman hlui, Pu K. Riachho pawhin thu an sawi a ni.
