Naktuka Total Bandh neih ve lohna tur Lawngtlai khawpui tih loh District Hqrs. khawpui zawng zawngah chuan bandh laia buaina chhuak palh thei ven nan DC leh SP ten Magistrate duty tur leh Police duty tur an ruahman fel vek tawh a, bandh hi naktuk zing dar 5 a\anga tlai dar 4 thleng neih a ni ang a, Aizawl khawpui leh District khawpui chhung hmun hrang hrangah bandh duty leh venhimna hnathawktute ngawrh takin an duty dawn a ni.

Hmarchhak bial pum huapa zirlai pawl inthlunkhawmna North East Students Organization-in he bill hi Parliament-ah pass thuai tum a ni tih Prime Minister, Pu Narendra Modi-an tun hnaia a sawi duh loh entirna atana bandh huaihawt a tum chhan hi hmarchhak biala leilung fa chengte ram dang a\anga lo pem lut ten awlsam taka an chimral an hlauh vang a ni a, he bill hi pass a nih chuan Afghanistan, Bangladesh leh Pakistan-a awm, Hindu, Sikh, Buddhist, Jains, Parsis leh Kristian te India ramah ram khualehtui nihna neiin an pem lut thei dawn a ni. Sorkar laipuiin he bill Parliament-a pass a tum hi State sorkar \henkhat leh pawl hrang hrang \hahnem takin an duh loh thu sorkar laipui an lo hriattir tawh a, Mizoram Assembly-ah pawh he bill pass tum duh lohna resolution chu nikum June thlaa Assembly fur \hutkhawmah khan khatihlaia Home Minister, Pu R. Lalzirliana putluhin House chuan a lo pass tawh a, hei hi sorkar laipuiah pawh hriattir a lo ni tawh a ni.

He bill pass tum duh loh entirna tura naktuka bandh neih tur hi Central YMA chuan an thlawp tih an sawi a, Lai Students Union pawhin an thlawp tih thuchhuah siamin an tarlang a, amaherawhchu, Lawngtlaiah Bandh huaihawt an tum ve dawn lo a ni.
Hetihlai hian Siahaah chuan Mara Students Organization Emergency Meeting vawiina neih chuan bandh zawm ve an tum tih an puang a, amaherawhchu, mipui vantlang zawng zawng huap lovin sorkar pisa zawng zawng leh zirna in zawng zawng huapin neih ni se an ti a ni.