Seling-Champhai kawng, National Highway 6 chu sawt zawka siam a nih theih nan leh he kawnga motor lian chhuk lam leh chho lam inpelin rei tak tak kawng a dal tawh loh nan Saitual SDO (Civil), Pu R. Vanlalsawma’n he kawnga motor lian intlan chhawktir dan tur a ruahman a, kar leh Thawhtanni, tun thla ni 11 atanga hman tur a ni. Ruahman dan chuan Champhai atanga Seling lam pan turte chu Thawhtanni, Nilaini leh Zirtawpniah an kal phal a ni ang a, Seling atanga Champhai lam pan turte chu Thawhlehni, Ningani leh Inrinniah an tlan thei dawn a ni. He khapna thupek hian Pathianni erawh chu a huam lo ang a, motor lian intlan chhawk tur hian 407 leh a hnuai lam a huam lova, motor lian, ke 6 nei chin erawh chu a huam a, hemi hma hian Champhai Bawrhsap chuan truck, ke 6 aia tam nei, he kawnga tlan hi a lo khap tawh a ni. He kawng hi lirthei chi tin kal theihin a tlang a, Tuivawl bula lei min thinna hmunah pawh duty-ten khawl hmangin lei min thar apiang an thian fai zel a ni.
