Pu Conrad Sangma chuan NPP chu hmarchhak biala Tribal mite tana thawk tura din a nih angin Mizoram leh Mizo mipuiten hma an sawn theih nan NPP Candidate te vote \heuh turin mipuite a ngen a ni. He inkhawm Vairengte Multipurpose Hall-a neihah hian Pu Conrad Sangma chuan, ram pum dinhmun thlirin NPP chu Congress Party aiin an lian zawk nia sawiin, Congress hian State 2-ah sorkar an siam laiin NPP chuan State 4-ah sorkar an siam thei thung niin a sawi a, ram puma mipuiten an hnawl mek Congress party chu vote tlak an ni lo tih sawiin, NPP chu hmarchhak bial mipui leh kristian-te tana din a nih angin kristian sakhaw humhalh duhtu Mizo mipuite tan NPP chu vote ngei chi a ni tih a sawi.
He inkhawm hi Vaireng MPF Local Forum hruaitu, Upa Robert Hrangmana’n a kaihruai a, Vairengte Group President, Pu R. Lalhmachhuana pawhin thu a sawi a ni. Vawiin vek khan Serchhip leh Thenzawlah pawh Meghalaya Home Minister, James Sangma chuan Serchhip biala an candidate, Pu Kapliana Pachuau tan beihpui a thlak a ni. Hemi bakah NPP hian Kolasib Diakkawn-ah pawh campaign beihpui an thlak a, hetah hian Kolasib biala NPP Official Candidate, Pu John Lalremruata’n thu a sawi a ni.
