Nepal ramah tui lian vangin mi 56 thi tawh

0
938
views

Nepal ramah tui lian avangin mi 56 an thi tawh a, tui lian avanga Chitwan district-a tangkhang, khualzin 600 zingah India mi 200 vel an tel. Nepal sorkar thuneitute chuan he chhiatna thlengah hian mi eng emaw zat chin hriat loha an la awm avangin thi zat hi an pun rin a nih thu an sawi a, Inrinni khan mi 30 vel an thi nia sawi a ni a, sipaite leh police-te’n chhanchhuah hna an thawk mek a, tui lian hian chenna in 34,000 chuang a chim pil niin sorkar thuneitute chuan an sawi. Sorkar hotute sawi dan chuan Nepal ram chhung hmun hrang hrangah hian tui lian avanga mi 56 an thih bakah mi 39 an bo va, mi 33 an hliam bawk a ni. Kathmandu-a Police office sawi danin, ram chhung khaw chhak lamah mi 19, ram laili-ah 23, khawthlang lamah mi 2 leh hmun dangah mi 12 an thi a. In 2,569 a chim bawk a, tui lian tuar hi mi nuai 60 vel nia hriat an ni. Hetianga tui a len chhan ber chu Triyuga luiin a kuang a liam nasat vang a ni a, sipai leh Police ten theihtawp an chhuah chungin, tuilian sulhnu hi a rapthlak hle niin thuneituten an sawi. Nepal tui lian hian inkal pawhna leh inbiak pawhna lam pawh a tichhe nasa a, eng pekna pawh chawlhkar khat vel hnuah siam that theih an beisei chauh a ni. Niminah khan sorkar chuan tuilian avanga thi ta chhungte chu cheng nuai 2 theuh pek a tiam a, PM, Sher Bahadur Deuba chuan thuneitute chu mi mangangte chhawmdawl leh chhanchhuahna kawngah theihtawp chhuah turin a hrilh a ni. Tuilian kaihhnawihah hian hri a lèn loh dan tur pawh ngawrh taka buaipui niin thuneitute chuan an sawi.