New Zealand chhimlama thliar kar pahnih, Christchurch leh district dang 2 ah te Cyclone Gita in chhiatna nasa tak a thlen avangin Emergency puan a ni. Tukina Cyclone tleh avang hian School tam tak khar a nih bakah motor kawngpui te pawh khar a ni a, New Zealand National Airline chuan Wellington atanga thlawhna thlawk chhuak tur leh tum tur zawng zawng zawng pawh a cancel nghal vek bawk. Helai biala cheng mipuite chu tuilianin harsatna a thlen zui tur thu leh thlipui darkar khata kilometre 150 vela chak a la tleh chhunzawm tur thu thuneitute chuan an hriattir a, Grey District leh Buller District te pawhin emergency hi an puang ve leh tawh bawk. Christchurch Mayor Lianne Dalziel chuan naktuk zing lam thlengin thlipui hi a la tleh rin a nih thu a sawi a, tui a len ngei rin lawk a nih avangin hmun hniam lama chengte chu insaseng turin an hriattir tih a sawi. Prime Minister Jacinda Ardern chuan thlipuiin a nuai hmunah te hian chhanchhuah hna thawk turin sipai tirh luh nghal an nih thu a sawi a, Wellington-a National Defence Office pawh inralring renga awmtir a ni a ti.
Chanchin Thar New Zealand-ah cyclone tleh, emergency puang
