In 400 khua, Hliappui-ah hian chenna in 300 vel zet rial hian a ti chhia a, in chung thlak vek ngai 189 leh a then azar thlak ngai in 79 a awm a ni. Vawiin hnatlangah hian in chung chhiate hi a vaia thawm that sen a ni lo a, a tul ang zela hnatlang neih chhunzawm an tum a ni. Hliappui khua hi Saitual, Ngopa, N.E Khadungsei Saichal, Lamzawl leh khaw thenawm-a pawl leh mimal tlawmngai engemaw zat in an hnatlanpui a, chawhnu dar 2 vel khan ruah a sur leh avangin hnatlanga thawk chhuakte an buai phah hle a ni.
Bialtu MLA Pu L.Thangmawia chuan nizan khan in chung khuh hul lailawkna tur silpoulin thahnem tak leh rangva thahnem tak a thawn nghal a, amah pawhin Hliappui khua hi a tlawh nghal a ni. in chung chih thatna tur Rangva hi bandel 350 vel vawiin lamah a thleng a, Mizoram Synod in Khawzawl atangin bandel 200 pek turin a ruahman bawk. Saitual bawrhsap Pu VL Hruaizela Khiangte, SP Pu PC Lalduhthlanga leh sorkar hotu dangte pawhin Hliappui chhiatna tawh dan hi enfiahin hmalak dan tur ruahmanna an siampui a ni.
Codnerc pawl hotu Pu B.Lalchhanzova chuan tanpuina Rs 20,000 a pek bakah kum upa mi 50 te tan chaw tha a pe a, pawl leh mimal te thawh khawm tanpuina tangkafai cheng nuai 2 vel a tlingkhawm tawh a ni.
