Video hi facebook leh WhatsApp group hrang hrangah a darh nasa hle a, video atanga a lan danin tleirawl pakhat chu task force duty nia langten a kutah tiangin an vuak bakah mi pakhatin a hnek lai ni awm tak a lang bawk a ni. He thil thleng-ah hian hmalakna an la nei rih lo tih Police te chuan zawhna chhangin an sawi.
Hetihlai hian Aizawl Dinthar Local Level Task Force on Covid-19 chuan vawiin khan thuchhuah siamin, Dinthar Local Level Task Force on Covid-19 leh Dinthar Branch YMA Vigilance Sub-Commitee-te chet dan, thu dik tluantling lovin video clip thehdarh a ni an ti.
Inrinni zan dar 12:00 hnu lamah tleirawl rual \henkhat, thuawih lo mi pariat-te chu an ruihhlo tih-lai, ganja nen man an ni an ti a, man an nih hnu hian thu zawhfiaha hawtir an tum laiin an zinga pakhat chuan duty-te tham lo taka tiletin, a cho let zawngin a khawsa a ni an ti. Duty-te hian amah bik hi zilhin, a kut an vuak bakah ben deuh a ni nghe nghe a ni an ti. Midang zawng chu an kutphahah vawi khat diat diat vuaa beng suk tir an ni a, an awmna veng khawtlang hruaitute hrilhin an ruihhlo man sakte nen an khawtlang hruaitute kutah hlan an ni tih Dinthar Local Level Task Force on Covid-19 thuchhuah hian tarlan a ni.
Thuchhuah an siam hi chanchinbu leh TV news te bakah an veng bialtu MLA, Councillor, State Level Task Force on Covid-19 Chairman, Aizawl DC, SP, LLTF Zone-5 bialtu Magistrate, Vaivakawn OC leh Tuikual North LLTF Chairman te an pe tel a ni.
