No Vehicle Zone siam leh

0
799
views

Traffic Management Coordination Committee ruahman angin vawiin khan Aizawl khawpui laili-ah lirthei kal phal lohna hmun “No Vehicle Zone” siam leh a ni a, mipuite chu zalen takin an Bazar leh a ni. No Vehicle Zone hi chawhma dar 10 a\anga tlai dar 4 thleng siam leh a ni a, nimin ang bawkin hemi chhung hian Chanmari leh Zodin Square inkarah Thirsakawr leh Nawrlirh tiamin lirthei eng chi mah tlan luh phal a ni lova. Chhim lamah chuan lirtheite chu Canteen kuala Pedestrian Fly Over Bridge hnuai a\angin an let leh a. Hmar lamah chuan Chanmari biak in an hel hnuah tlan let tir leh zel an ni. Kum danga la tih ngai loh angin kumin hian No Vehicle Zone huam chhung kawngsira thil zawrh phal a ni a, Zonet zawhna chhangin, Traffic hotute chuan, kawngpui dunga inzawrh hi Dawrpui Local Council hruaituten ngenna anga phal a nih thu leh, hei hi kawnga kal mipui tan hnawk deuh mah se, harsatna a thlen lutuk lo nia an hriat thu an sawi a. Kawng dunga inzawrh phal a nih avang hian Bazar chhung tawt lutuk tur pawh a ziaawm phah deuh nia an hriat thu leh Bazar chhung lut kher lova, kawng dunga thil lei ta mai mi tam tak an awm tih sawiin, a bikin No Vehicle Zone hi naupang leh kum upa lam, ni danga Bazar-a kal ngai vak lo pawhin an chhawr hle niin an sawi. Traffic hotute chuan, vawiina No Vehicle Zone siam a nih chhung hian buaina leh harsatna thleng a awm lo tih a sawi a. Aizawl chhim leh hmar inkalpawhna kawngpui khar a nih avanga a helna kawng siamah pawh Traffic Jam vanga harsatna liantham a thleng lo niin an sawi.

Krismas leh kumthar vuakvetah mipuiten thlamuang taka chakkhai an lam theih nan December ni 13 a\ang khan Aizawl Bazar chhung hmun lun lai 3 – Dawrpui Taxi Stand, Power House piaha Pu V. Lalliana Building bul leh Bazar chhung High Mass bulah Temporary Police Help Desk siam a ni a. Hmun hrang hranga Police Duty-te chuan, mipui lam a\angin harsatna an dawn mang lo tih an sawi. No Vehicle Zone hi December ni 30-ah siam leh a ni ang.