Election Commission of India ruahman angin Online-a Electoral Roll enkawlna software thar, ERO-Net tia vuah chu vawiin khan Mizoramah hman tan a ni a, vawiin chhun dar 12 khan Chief Electoral Officer, Pu SB Shashank chuan District hrang hranga Election Officer-te hmuh laiin Video Conferencing hmangin a hawng a ni. Software thar hman a nih thu hi Chief Electoral Officer, Pu SB Shashank chuan, Aizawl Press Club-ah thuthar lakhawmtute a hrilhfiah a, ERO-Net hi tun hmaa Electoral Roll enkawlna atana hman thin, ERMS aiin kawng tam takah a that zawk beisei a ni tih a sawi a. Hemi hmang hian Electoral Roll-a inthun duh chuan, nvsp.in atangin Online hmangin dilna an thehlut thei tawh dawn a, an dilnain a thlen chin pawh SMS hmangin awlsam takin an hre thei ang a, Assembly bial danga insawnte pawh an awmna hluia an hming paih kher lovin an awmna thara Roll-a an inziah luh hunah amahin a lo inpaih mai dawn a ni.
Zawhna chhangin Election Department hotute chuan, Electoral Roll-a inthun dilte tan Online hmanga dilna thehluh theih a nih avangin mi dik lo tan hun a inhawn phah dawn chung lo niin an sawi a. Election Commission of India-in inkaihhruaina dan a siamah Roll-a inthun dilte chu a hmuna enfiah kher ngai lo mah se, Mizoramah chuan a hmunah enfiah zel a ni dawn a. Software thar hmang hi chuan hming ziah dan dik lo emaw, Address dik lo emaw ang chi bak enfiah lova pawm a ni dawn lo niin an sawi.
