Hemi puala inkhawm an College Auditorium-a neihah hian Principal, Dr. Tawnenga chuan, zirlaite chu pass chauh duhtawk lova, thiamna tak tak nei tura zir turin a chah a. Central Service-a tlin tum tak takte chu college-in theihtawp chhuaha a puih tur thu sawiin, zirlai lut tharte chu faina leh thianghlimna kawnga hmasawn turin a fuih bawk. PUC-ah hian kuminah BA zir thar 502, B.Sc. zir thar 389, B.Com zir thar 64 leh BBA zir thar 34 awmin, zirlai lut thar hi an vaiin 989 an ni a. Heng mite nena PUC-a zirlai awm zawng zawng chu 2,410 an ni.
Mizoram Univeristy-in tun hnaia UG examination 2018 result a tihchhuahah PUC a\ang hian subject hrang hrang hranga Top 10 a lang 125 leh subject topper 16 an awm.
Arts stream-a mark hmu sang ber, History Department zirlai Lalbiakenga hnenah HK Bawichhuaka Award hlan a ni a. Science Stream-a mark hmu sang ber Botany zirlai, Malsawmthanga hnenah Khawtinkhuma Award hlan niin, Commerce stream-a mark hmu sang ber Lalhmingsangi hnenah Lenrual Hlui Award hlan a ni a. PUC zirlai pahnih hnenah IIT (Kozhikode)-in Promising Award an hlan bawk.
PUC-ah hian kumin August thla a\angin MA (Mizo), MA (Philosophy) leh M.Sc. (Life Science) zirna hawn a ni dawn a ni. Zirlai tharte lawmnaah hian zirtirtu aiawhin, Dr. Margareth Z. Khiangte-in zirlai lawmna thu a sawi a ni.
