SP CID( Crime) hnuaia din, Special Investigation Wing hi vawiin khan DGP Pu SBK Singh-a’n a hawng a. Inspector R Vanlalzawma kaihhruaina hnuaiah Inspector dang pakhat, Sub Inspector 2, Asst Sub Inspector pakhat, Head Constable leh Constable pakhat ve ve, an vaiin police 7 an awm dawn a ni.
Special Investigation Wing hian pawikhawihna lian zual, pawngsual leh tual thah ang chi te, rukrukna lian zual leh bomb puak ang chi te, intellectual property rights kaihhnawih leh sum leh pai kaihhnawiha pawikhawihna cheng vbc 5 chin chunglam te, pawisa lem chungchang leh mihring hmanga sumdawnna lam chi te an bawhzui bik dawn a ni.
Hawnna inkhawmah hian IGP pahnih Pu Shanliana leh Pu John Neihlaia te bakah police hotulu dangte an tel a. DIG(CID) Pu Neihchungnunga’n inkhawm a kaihruai a, SP CID(Crime) Pu LR Dingliana’n Special Investigation Wing din a nih dan leh a hnathawh dan turte a sawifiah a ni.
