Ram chhung hmun dangte rualin vawiin khan Prime Minister hlui, Pu Atal Bihari Vajpayee sun nan Mizoramah pawh Sorkar Pisa leh zirna in zawng zawng khar a ni a, hnam puanzar pawh a ngul chanvea zar a ni.

0
258
views

Puan tawh angin kum 93 mi Pu Atal Bihari Vajpayee hi nimin tlai dar 5:05 khan New Delhi-a All India Institute of Medical Sciences-ah a thi a, amah sun nan hian Mizoram Sorkar chuan vawiin hi chawlh-ah a puang a, a sun nan kar khat chhung hman puanzar pawh a ngul chanveah zar a ni dawn a ni.

Larsap, Pu Kummanam Rajashekharan chuan, ram roreltu ropui leh huaisen, hla phuah thiam leh thu leh hla lama mi ril, ngaihtuahna seng mi Prime Minister hlui, Pu Atal Bihari Vajpayee thihna chu ram tan channa nasa tak a ni tih a sawi a. External Affairs Minister a nih lai khan khawvel ramdangte nen inlaichinna \ha nei turin hma a la nasa a, Prime Minister a nih chhung khan a rem hriatna avangin hun khirh tak pawh harsatna lutuk thleng lovin ramin a paltlang phah nia sawiin, ram tana a hnawthawh tawhna avangin zahna chibai a buk a, a chhungte ka tuarpui thu a sawi bawk.

Chief Minister Pu Lal Thanhawla pawhin Prime Minister hlui, Pu Atal Bihari Vajpayee a thi chu pawi a tih thu leh a ui thu a sawi a. India-in politician ropui tak a chan ta a ni, a ti. Pu Vajpayee kha politics lama mithiam a nih bakah thusawi thiam leh ziakmi ril tak a nihna chu ram mipuite tan rohlu a chang reng tawh dawn tih sawiin, a kalsan tak a chhungte chu Pathianin a thlamuan a duhsak thu a sawi a ni.