Reformation kum 500 tlin ATC-in lawm

0
498
views

Aizawl Theological College chuan Kohhran siamthatna Reformation kum 500 tlin, Aizawl Chanmari Presbyterian Kohhran Biak Inah vawiin khan a lawm. He ni lawmna hi Mizorama Kohhran hrang hrang, Baptist Church of Mizoram, Evangelical Church of Maraland, Lairam Isua Krista Baptist Kohhran, Salvation Army, UPC Northeast India, Seventh Day Adventist leh Roman Catholic Kohhran aiawhten an hmanpuia, thu pawh an sawi vek a ni. Kohhran hrang hrang aiawhten thu an sawi hnu hian Aizawl Theological College-a Calvin Study Centre Director, Prof. T. Vanlaltlanin Kohhran siamthatna chanchin a sawi a, Rev. Dr. H. Vanlalauva’n Kohhran siamthat lehna chungchang leh hei hian khawvel hmun hrang hranga Kristian te a nghawng dan a tarlang bawk a ni. Kohhran siamthat lehna bul tumtu, Martin Luther-a chuan kum 1517 October ni 31 khan Wittenberg Castle Church-ah thuchhuah Thesis 95 a tarchhuak a, he ni champha hi khawvel hmun tam taka Kristian ten an lawm angin Mizoramah pawh ATC bultuma lawm a ni. He inkhawm hi ATC Principal, Rev. Prof. C. Lalhlira’n a kaihruai a ni.