Rokunga Memorial Society-in Zo hnahthlak zinga mi entawntlak Lunglei Lunglawna Pu R. Zaikunga hnenah naktip ningani hian Rokunga Award an hlan dawn tih an puang.
Rokunga Award sem a nih tur thu hi vawiin khan Rokunga Memorial Society hruaitute chuan Aizawl Press Club-ah thuthar lakhawmtute an hrilhfiah a, an pawl Vice Chairman, Pu B. Lalthangliana chuan, he chawimawina hi Mizo nunze mawi chhawm nun a nih theih nana buatsaih a ni tih sawiin, hemi buaipui tur hian YMA chu phungbawmah sawm a ni a, hei hi dik taka tih a nih theih nan a thlantu zingah Society-a tel ve lo mi 4 leh Society aiawh 1 ruat an ni tih a sawi. Rokunga Memorial Society hruaitute chuan, he chawimawina hian tangkapui, thuziak leh pawisa fai cheng sing 5 a keng dawn nia sawiin, kum 3 dana sem tura ruahman a ni tih an sawi a. A dawng tur chu mihring damlai ngei, kum 50 aia naupang lo nih a ngai a, hei hian a tum chu nunphunga Mizo zepui nunpuitu a nih dawn vang a nih thu an sawi. He chawimawina hi zo hnahthlak tan dawn theih vek niin, Mizo nunze mawi tlawmngaihna, huaisenna, taimakna, tawrhchhelna leh midang tana hnawksak lo hnenah hlan \hin tum a ni a, khawvel thila miropui thlan an ni lem lo tih an sawi. He chawimawina pek tur hi Vanglaini ni tin chanchinbu chuan sum leh thil \ul dang a tumsak dawn a ni.
