Ruah sur nasa vangin Aibawk leh Darlung inkar kawng hmun hnihah leimin

0
585
views

Nimina ruah nasa taka sur avang khan Aibawk leh Darlung inkar kawng chu lei minin hmun hnihah a hnawh ping a, kawng pinna hi Aibawk leh Tlawng inkar, Aibawk atanga km 7-naah leh Darlung leh Tlawng inkar, Darlung atanga km 4 leh a chanve velah a ni a, heng kawng pingte thian fai tur hian hi vawiin khan khawl hmanga thawh nghal a ni. Aizawl-Sialsuk kawnga Changte lui kana Samlukhai lam atanga kalna kawng pawh tukin khan Samlukhai khaw bulah lei minin a hnawh ping a, he kawng ping hi JCB hmanga vawiina siam tlang leh tura beih nghal a ni. Aizawl-Thenzawl-Lunglei World Bank kawng chu Ramlaitui khaw chhungah lei minin vawiin khan a hnawh ping a, hei hi siam tlang leh thuai tura beih nghal a ni. Hemi bak kawng dang chu tun thlengin a tlang vek niin PWD Highway enkawltute chuan an sawi. Seling-Champhai-Zokhawthar National Highway 6-a Tuivawl kama lei min thin pawh min nawn leh mah se, motor kal tlang theiha siam nghal zel a ni a, amaherawhchu, lei minna ko chunga electric hruipui, 132KV Line thlunna tower chu min thla mai thei tur anga a lan avangin a hnuaia hnathawh a hlauhawm niin hnathawktute chuan an sawi a, he kawlphetha pekna hruipui bana hrui thlun hi hlih vek a, a bul hnai bera tower nen thlun zawm a ni tawh a ni.